Корҳои ободонию сабзкорӣ ба муносибати ҷашни Наврӯз дар ФБД вусъат мегиранд

ДУШАНБЕ, 16.03.2017/АМИТ «Ховар»/. Бо фарорасиии фасли зебои сол- баҳор ва Наврӯзи ҳуҷастапай дар Фурудгоҳи байналмилалии Душанбе корҳои ободонӣ ва сабзкорӣ вусъати тоза мегиранд. Дар ин росто аз ҷониби кормандони Хадамоти аэровокзал ва сабзкорӣ шинонидани дарахтони ороишиву сояафкан ва гулу буттаҳо идома дорад.
Назар ба иттилои Ҷамила Ҳусейнова, котиби матбуоти Фурудгоҳи байналмилалии Душанбе дар ин муддат дар ҳудуди аэровокзал 57 адад дарахти шоҳбулут, 8 адад дарахти заранг, наздик ба 9 ҳазор адад қаламчаи гулҳои садбарг, 29290 бех гулҳои мавсимӣ, 7300 адад гули мавсимии лола, 1000 адад буттаҳои ҳамешасабз, 2000 метри кубӣ чаманзор, 8 адад дарахти нахл ва боз даҳҳо намуди гулу буттаҳои ороишию хушбӯй шинонида шуданд.
Хадамоти аэровокзал ва сабзкории ҶСК «Фурудгоҳи байналмилалии Душанбе» баҳри ободию тозагии атрофи фурудгоҳ пайваста кӯшиш менамояд. Кормандони он ҳамеша талош доранд саҳни бинои терминал, толори гусел ва пешвози намояндагони расмӣ, хатҳои маҳаллӣ, толори президентӣ ва ошхонаи «Парвоз» поку озода бошанд.