Н.Олимзода: «Ба комиссияҳои даъвати наваскарон духтурони ботаҷриба сафарбар карда шаванд»

ДУШАНБЕ, 31.03.2017 /АМИТ «Ховар»/. Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1990-1999 Ҷумҳурии Тоҷикистон ба хизмати ҳарбӣ» дирӯз дар Вазорати тандурустӣ ва ҳифзи иҷтимоии аҳолии Чумҳурии Тоҷикистон мавриди баррасӣ қарор гирифт. Дар ин бора аз Вазорати мазкур хабар доданд.
Насим Олимзода, Вазири тандурустӣ ва ҳифзи иҷтимоии аҳолии Ҷумҳурии Тоҷикистон баҳри иҷрои ҳатмии Фармони мазкур ба кормандони соҳаи тандурустӣ, ки ба комиссияҳои тиббӣ шомиланд, дастуру супоришҳои қатъӣ дод.
Зикр шуд, ки ба комиссияҳои даъват духтурони ботаҷриба ва дигар кормандони соҳаи тиб, ки малакаи амалии кор дар комиссияро доранд, сафарбар карда шуда, онҳо бо воситаҳои зарурӣ, таҷҳизоти тиббӣ ва ҳангоми зарурат бо мошинҳои ёрии таъҷилӣ таъмин карда шаванд.
Дар ҷамъомади корӣ намояндагони сарпрокуратураи ҳарбии Ҷумҳурии Тоҷикистон ва Вазорати мудофиаи Ҷумҳурии Тоҷикистон, роҳбарияти Вазорати тандурустӣ ва ҳифзи иҷтимоии Ҷумҳурии Тоҷикистон ва роҳбарони муассисаҳои тиббиву пешгирии кишвар иштирок намуда, дар якҷоягӣ мушкилоти ҷойдоштаро мавриди муҳокима қарор дода, роҳҳои ҳалли онро пешниҳод намуданд.
Умедҷон Солиев, сардори шуъбаи даъват ва пуррагардонии Раёсати ташкил ва сафарбарии Вазорати мудофиаи Ҷумҳурии Тоҷикистон зикр намуд, ки «бо вуҷуди ба танзим даромадани сатҳу сифати кори комиссияҳои тиббии даъватшавандагон, ҳанӯз ҳам камбудиҳо дар ин самт ҷой доранд, ки ислоҳи онҳо ногузир аст. Ҳолатҳои ба сафи қувваҳои мусаллаҳ даъват шудани ҷавонони дорои бемориҳои гуногун, ҷавонони маъюб дида мешаванд, ки бартараф кардани ин ҳолатҳо аз табибони дар комиссияҳо шомилбуда масъулияти баланду ташхиси дақиқро талаб мекунад».