Саркашӣ аз пардохтҳои гумрукӣ ошкор гардид

ДУШАНБЕ, 15.03.12017 /АМИТ «Ховар»/. Аз тарафи кормандони Раёсати минтақавии гумрук дар вилояти Суғд зимни гузаронидани амалиёти гумрукӣ муайян карда шуд, ки аз 5 август то 27 декабри соли 2016 ва 6 январи соли равон аз Ҷумҳурии Халқии Хитой ба суроғаи ҶДММ «Билол Суюлин Семент», воқеъ дар кӯчаи Камоли Хуҷандӣ, 33-и шаҳри Конибодом дар бордони 6 воситаи нақлиёти боркаш таҷҳизоти технологии барои истеҳсоли семент ворид гардида, он дар анбори молворидкунанда барои нигоҳдории муваққатӣ ҷойгир карда шудааст.
Тавре аз Маркази матбуоти Хадамоти гумруки назди Ҳукумати Ҷумҳурии Тоҷикистон хабар доданд, ҳангоми тафтиш муайян гардид, ки пардохтҳои гумрукии таҷҳизоти технологии барои истеҳсоли семент воридгардида 42 милиону 880 ҳазору 995 сомониро ташкил додаанд, ки аз ин ҳисоб танҳо ба маблағи 32000 сомонӣ аз ҷониби ширкати мазкур пардохт карда шудааст. Дар натиҷаи саркашӣ аз пардохтҳои гумрукӣ аз ҷониби директори ширкати номбурда М.А. ба буҷети давлат ба маблағи 39 милиону 680 ҳазору 995 сомонӣ зарари калон расонида шудааст.
Аз рӯи ҳолати мазкур нисбат ба директори ҶДММ «Билол Суюлин Семент» М.А. бо моддаи 291 қисми 1-и Кодекси Ҷиноятии Ҷумҳурии Тоҷикистон парвандаи ҷиноятӣ оғоз карда шуда, аз рӯи тобеияти тафтишотӣ ба прокуратураи шаҳри Конибодом ирсол гардид.