Ҷавонон-ҳомиёни ояндаи Ватан: «Ба эътимоди Пешвои миллат содиқ бояд буд»

ДУШАНБЕ, 13.04.2017 /АМИТ «Ховар»/. Дар Академияи Вазорати корҳои дохилии Ҷумҳурии Тоҷикистон бахшида ба Соли ҷавонон аз тарафи Шӯрои ҷавонон ва Шӯрои роҳнамои Академияи ВКД дар мавзӯи «Ҷавонон- ояндаи миллат» ҷамъомад баргузор гардид.

Тавре аз Маркази матбуоти  Вазорати корҳои дохилии Ҷумҳурии Тоҷикистон хабар доданд, дар ҷамъомад курсантони Академияи мазкур андешаҳои худро доир ба саҳми ҷавонон ва нақши онҳо дар рушду нумӯи кишвар иброз намуданд.

Курсантони Академияи ВКД дар мавзӯъҳои «Хусусияти Паёми Пешвои миллат», «Пешвои миллат-роҳнамои ҷавонони кишвар», Қонуни Ҷумҳурии Тоҷикистон «Дар бораи ҷавонон ва сиёсати давлатии ҷавонон»,«Асосҳои ташкилӣ-ҳуқуқии ҳамкории мақомоти корҳои дохилӣ бо институти ҷомеаи шаҳрвандӣ дар соҳаи муқовимат бо коррупсия» маърӯза карданд.

Зикр гардид, ки Пешвои миллат соли 2017-ро дар Ҷумҳурии Тоҷикистон Соли ҷавонон эълон намуданд. Пас ҷавононро зарур аст, ки дар омӯзиши илмҳои замони муосир ва пешрафту шукуфоии Ватан саҳмгузор бошанд.