Баргузории аввалин фестивали ақаллиятҳои миллӣ дар Хатлон

ҚӮРҒОНТЕППА, 28.04.2017 /АМИТ «Ховар» /.  Имрӯз дар шаҳри Қӯрғонтеппа  аввалин  фестивали  вилоятии  санъат  ва   фарҳанги ақаллиятҳои   миллӣ  баргузор гардид.  Дар он намояндагони  тамоми  ташкилотҳои  ҷамъиятии  фарҳангии  ақаллиятҳои миллӣ  ширкат  намуда,  либос,  намудҳои хӯрок  ва  санъати худро ба  иштирокчиён  муаррифӣ намуданд.

Фесивали мазкур  аз  тарафи Мақомоти иҷроияи  ҳокимияти давлатии вилояти  Хатлон дар  ҳамкорӣ бо бахши вилоятии  Ҷамъияти  дӯстӣ ва  алоқаҳои фарҳангии Тоҷикистон  баргузор  гардид.

Фестивал ба  20-солагии  Рӯзи Ваҳдати миллӣ  ва  Соли ҷавонон  бахшида  шуда, ҳадафи он  аз эҳё, ҳифзу  гиромидошт,  такомули анъанаву  суннатҳои мардумӣ,  тарғиби  дастовардҳои  фарҳангиву  ҳунарӣ,  пайдо  намудани истеъдодҳои нав,  мустаҳкам намудани робитаҳои  дӯстӣ миёни миллатҳо  ва  дар рӯҳияи ватандӯстӣ  тарбия намудани  ҷавонон  иборат буд.