Дар Ҷумҳурии Тоҷикистон таваҷҷуҳ ба истеҳсоли атласу адрас зиёд мешавад

ДУШАНБЕ, 11.04.2016 /АМИТ «Ховар»/. Бо дастгирӣ ва таваҷҷуҳи бевоситаи Пешвои миллат Эмомалӣ Раҳмон ҶДММ «Атласи Хуҷанд» дубора ба фаъолият оғоз карда, истеҳсоли атласу адрасро роҳандозӣ намуд. Тавре аз маркази матбуоти Вазорати саноат ва технологияҳои нави Ҷумҳурии Тоҷикистон иттилоъ доданд, ҳоло дар корхонаи мазкур 32 адад дастгоҳҳои матоъбофӣ насб гардида, истеҳсоли атласу адрас, ки имрӯз талабот ба ин ду навъи матои миллии мардуми тоҷик ҳам дар дохил ва ҳам дар бозори минтақа бештар мебошад, васеъ ба роҳ монда шудааст.
Дар корхонаи мазкур беш аз 40 нафар бонувон ва ҷавонон машғули кор буда, дар ин коргоҳ зиёда аз 60 намуди матои атлас ва 30 намуди матои адрас истеҳсол мешаванд.
Аз нигоҳи сифат ва тарҳ матоъҳои асласу адрас ба талабот ҷавобгӯ буда, давоми моҳҳои январ-марти соли 2017 аз ҷониби корхонаи ҶДММ «Атласи Хуҷанд» 0,92 ҳазор метри мураббаъ матои атлас истеҳсол карда шудааст.