«Файзу баракати Ҳисор» ба кишти пахта оғоз кард

ДУШАНБЕ, 11.04.2017 /АМИТ «Ховар»/. Дирӯз бо иштироки Маҳмадтоҳир Зокирзода, муовини Сарвазири Ҷумҳурии Тоҷикистон, Изатулло Сатторӣ, Вазири кишварзии Ҷумҳурии Тоҷикистон, Шарифҷон Ҷумъазода, Раиси шаҳри Ҳисор ва пирони кору кишоварзон дар хоҷагии деҳқонии «Файзу баракати Ҳисор» мавсими кишти пахта оғоз гардид.
Тавре аз Мақомоти иҷроияи ҳокимияти давлатии шаҳри Ҳисор хабар доданд, Маҳмадтоҳир Зокирзода оид ба бартарияти кишти пахта, истифодаи самараноки замин, таъмини оби полезӣ, омодагии техникаҳо ба мавсими кишт ва дигар масъалаҳои соҳаи кишоварзӣ маслиҳати муфид дода, ҳозиринро даъват кард, ки ҳар ваҷаб заминро мақсаднок истифода намуда, дар таъмини амнияти озуқавории мамлакат саҳмгузор бошанд.
Маврид ба зикр аст, ки дар минтақаи мазкур 80 гектар замин барои кишти пахта омода аст.
Шарифҷон Ҷумазода бо эътимод таъкид кард, ки дар ҷавоби ғамхориҳои пайвастаи Пешвои миллат муҳтарам Эмомалӣ Раҳмон сокинони шаҳри Ҳисор омодаанд иҷрои нақшаҳои меҳнатиро барзиёд таъмин намуда, дар ободии Тоҷикистон саҳм гузоранд.