«Нақши Пешвои миллат дар ташаккул ва рушди иқтисодиёти миллӣ»- ҷамъомад дар Суғд

ДУШАНБЕ, 12.04.2017 /АМИТ «Ховар»/. Дар Донишгоҳи давлатии ҳуқуқ, бизнес ва сиёсати Тоҷикистон бахшида ба Соли ҷавонон таҳти унвони «Нақши Пешвои миллат дар ташаккул ва рушди иқтисодиёти миллӣ» бо ҷалби васеи олимону донишҷӯён ҷамъомад баргузор гардид.
Муъмин Шарифзода, Ректори донишгоҳи давлатии ҳуқуқ, бизнес ва сиёсати Тоҷикистон гуфт: «Устодону донишҷӯён бояд аз таҷрибаи бойи олимони донишгоҳ баҳравар гашта, дар корҳои илмӣ- татқиқотӣ ворисони арзанда ва идомадиҳандагони фаъоли насли солор бошанд. Зеро маҳз ба шарофати фаъолияти пурсамари олимони кишвар Тоҷикистон аз бунбасти коммуникатсионӣ раҳоӣ ёфта, ба таъмини амнияти озуқаворӣ имконият пайдо менамояд»
Профессор Алиҷон Бойматов дар мавзўи «Нақши Пешвои миллат дар ташаккул ва рушди иқтисодиёти миллӣ» маърӯза намуда, зикр кард, ки маҳз бо таваҷҷуҳи бевоситаи Пешвои миллат ва сиёсати пешгирифтаи Ҳукумати Ҷумҳурии Тоҷикистон кишвари мо тавонист низоми иқтисоди бозорӣ, марҳилаҳои муҳимтарини рушди иқтисодиёти кишвар, Барномаи таҳаввулоти иқтисодии ҶТ дар мавриди тарҳрезии барномаҳои ислоҳоти иқтисодӣ ва механизмҳои амалигардонии онро ба роҳ монад.
Зикр гардид, ки ҳадаф аз баргузор намудани чунин ҷаласаю нишастҳо дар донишгоҳ ташаккули маърифатнокии устодони ҷавон, боло бурдани сатҳ ва сифати корҳои илмию татқиқотӣ ва беҳдошти донишҳои назариявию амалии донишҷӯён мебошад.