Ошкор ва пешгирии интиқоли ғайриқонунии маҳсулоти қаннодӣ

ДУШАНБЕ, 04.04.2017. /АМИТ «Ховар»/. Кормандони шуъбаи мубориза бар зидди ҳуқуқвайронкуниҳои гумрукӣ дар Раёсати минтақавии гумрукӣ дар шаҳри Душанбе 26 феврали соли равон, тахминан соатҳои 13:30 ҳангоми гузаронидани амалиёти гумрукӣ бо мақсади пешгирӣ ва ошкор намудани ҳуқуқвайронкуниҳо дар самти шоҳроҳи Душанбе — Хуҷанд, воқеъ дар мавзеи Чорбоғи ноҳияи Варзоб мошини тамғаи «Мерседес — Бенс — Атеко», рақами қайди давлатиаш TJ 27 — 08 DD 02 — ро, ки таҳти идораи ронанда Б. А., соли таваллудаш 1979, зода ва истиқоматкунандаи шаҳри Хуҷанди вилояти Суғд қарор дошт, барои гузаронидани санҷиши қонунияти воридоти мол нигоҳ доштанд. Дар ин бора ба АМИТ «Ховар» аз Хадамоти гумруки назди Ҳукумати Ҷумҳурии Тоҷикистон хабар доданд.
Зимни пурсиши шифоҳӣ Б. А. иброз дошт, ки дар дохили бордони воситаи нақлиёташ танҳо масолеҳи сохтмонии намуди «ламинат» мавҷуд аст ва ҳуҷҷатҳои масолеҳи сохтмониро пешниҳод намуд.
Аммо ҳангоми муоинаи гумрукӣ маълум гардид, ки дар дохили мошин ба миқдори 1995 кг маҳсулоти қаннодии истеҳсоли ширкати «Рошен»-и Ҷумҳурии Украина, 995 кг кулчақанд, 2580 кг маргарин ва ба миқдори зиёда аз 2160 литр оби ҷави тамғаҳои гуногуни истеҳсоли Федератсияи Русия мавҷуд аст.
Муайян гашт, ки маҳсулоти қаннодӣ, кулчақанд ва равған, мансуб ба шаҳрванди Ҷумҳурии Тоҷикистон А. Н., соли таваллудаш 1987, зода ва истиқоматкунандаи ноҳияи Ховалинги вилояти Хатлон буда, машруботи спиртии оби ҷав ба шаҳрванди Ҷумҳурии Тоҷикистон Ш. У., соли таваллудаш 1998, зода ва истиқоматкунандаи шаҳри Душанбе мансуб мебошанд.
Интиқолдиҳандагони мол доир ба моли мазкур ягон ҳуҷҷати воридотӣ пешниҳод карда натавонистанд.
Нисбат ба ҳолати мазкур парвандаи ҳуқуқвайронкунии маъмурӣ оғоз гардида, он барои моҳиятан дида баромадан ба мақомоти дахлдор ирсол карда шуд.