Рустами Эмомалӣ вакили Маҷлиси вакилони халқи шаҳри Душанбе интихоб гардид

Апрель 3, 2017 14:44

ДУШАНБЕ, 03.04.2017/АМИТ «Ховар»/. Дирӯз дар ҳавзаҳои интихоботии №25 (ноҳияи Исмоили Сомонӣ) ва №62 (ноҳияи Фирдавсӣ) интихоботи вакилони Маҷлиси вакилони халқи шаҳри Душанбе ба ҷои вакилони хориҷшуда баргузор гардид.
Мувофиқи маълумоти комиссияи шаҳрӣ оид ба интихоботи вакилони Маҷлиси вакилони халқи шаҳри Душанбе, пас аз ҷамъбасти натиҷаи овоздиҳӣ дар ҳавзаи интихоботии №25 (ноҳияи Исмоили Сомонӣ) номзад аз Ҳизби Халқӣ-Демократии Тоҷикистон Рустами Эмомалӣ бо дарёфти 84,80 дарсади овозҳо вакили Маҷлиси вакилони халқи шаҳри Душанбе интихоб гардид. Рустами Эмомалӣ дар ин ҳавза ҷойгузини шаҳрдори пешин, ки ваколаташ пеш аз муҳлат, 7 феврал дар иҷлосияи ғайринавбатии Маҷлиси вакилони пойтахт қатъ гардида буд, интихоб шуд.
Дар ин ҳавза бо Рустами Эмомалӣ номзадҳо аз Ҳизби аграрии Тоҷикистон Фазлиддин Икромов (7,81 дарсад) ва Ҳикматуллоҳ Саидиён аз Ҳизби Демократии Тоҷикистон (2,65 дарсад) рақобат карданд.
Ба иттилои манбаъ, аз шумораи умумии интихобкунандагон дар интихобот 86,69 нафар иштирок карданд.
Дар ҳавзаи интихоботии №62 (ноҳияи Фирдавсӣ) номзад аз Ҳизби Халқӣ-Демократии Тоҷикистон Маҳмадсаид Зувайзода 75,11 дарсади овозҳо, номзад аз Ҳизби Аграрии Тоҷикистон Мавсума Абдуллоева 11,65 дарсади овозҳо ва Васила Файзуллобекова — номзад аз Ҳизби Коммунистии Тоҷикистон 8,78 дарсади овозҳоро ба даст оварданд.
Дирӯз ҳамчунин дар ҳавзаҳои интихоботии №4, №8, №23 ва № 24 интихоботи вакилон ба ҷои вакилони хориҷшуда дар Маҷлиси вакилони халқи ноҳияҳои Сино, Шоҳмансур ва Исмоили Сомонӣ доир шуд.
Дар ҳавзаи интихоботии №4 интихоботи вакилони Маҷлиси вакилони халқи ноҳияи Синои шаҳри Душанбе номзад аз Ҳизби Халқӣ-Демократии Тоҷикистон Нусратулло Салимзода 74,75 дарсади овозҳо ва Абдуҳалим Раҷабов, номзад аз Ҳизби Ислоҳоти Иқтисодии Тоҷикистон 17,72 дарсади овозҳоро соҳиб шуданд.
Дар ҳавзаи интихоботи №8 вакилони Маҷлиси вакилони халқи ноҳияи Шоҳмансури шаҳри Душанбе номзад аз Ҳизби Халқӣ-Демократии Тоҷикистон Низом Ҳакимзода 74,63 дарсад ва номзад аз Ҳизби Сотсиалистии Тоҷикистон Иноят Дадоҷонова 18,7 овозҳоро ба даст оварданд.
Дар ҳавзаи интихоботии №23 интихоботи вакилони Маҷлиси вакилони халқи ноҳияи Исмоили Сомонии шаҳри Душанбе номзад аз Ҳизби Халқӣ-Демократии Тоҷикистон Ҳаётзода Бозоралӣ Ҷаббор 73,97 ва номзад аз Ҳизби Ислоҳоти Иқтисодии Тоҷикистон Тоҷев Манучеҳр Наҷмуддинович 18.24 дарсади овозҳоро ба даст оварданд.
Дар ҳавзаи интихоботии №24 интихоботи вакилони Маҷлиси вакилони халқи ноҳияи Исмоили Сомонии шаҳри Душанбе номзад аз Ҳизби Халқӣ-Демократии Тоҷикистон Шариф Самӣ 74,07, номзад аз Ҳизби Сотсиалистии Тоҷикистон Шарифамо Каримова 12,84 ва номзади худпешбар Ислом Гадойбоев 8,70 дарсади овозҳоро ба даст оварданд.