Суғд: оғози корҳои обрасонӣ аз ҷониби пойгоҳҳои обкашӣ

ХУҶАНД, 19.04.2017. /АМИТ«Ховар»/. Дар ноҳияҳои вилояти Суғд марҳалаи обрасонӣ ба зироати кишоварзӣ идома дорад. Идораи давлатии беҳдошти замин ва обёрии ноҳияҳои вилоят дар ин самт корҳои таъмири пурраи пойгоҳҳои обкашӣ ва тоза кардани иншооти обрасонро ба анҷом расонида, ба корҳои бо об таъмин намудани хоҷагиҳо оғоз кардаанд.

Аз ҷумла, дар яке аз ноҳияҳои калонтарини пахтакори вилояти Суғд – Зафаробод 12 пойгоҳи обкашӣ ва 28 агрегат мавҷуд буда, соли равон баҳри таъмиру азнавбарқароркунии ин пойгоҳҳо ва дастраскунии қубурҳои калонҳаҷми диаметрашон 2020 миллиметра аз буҷети вилоят 610 ҳазор сомонӣ маблағ ҷудо гардида, таъмири пурраи он ба анҷом расидааст.

Тавре аз Идораи кишоварзии ноҳия иттилоъ доданд, пойгоҳҳои обкаши ноҳия 30 ҳазор гектар замини киштро бо об таъмин намуда, ҳамчунин 3800 хоҷагии деҳқонӣ, 32 ассотсиатсия ва 1900 гектар замини минтақаҳои ноҳияи Деваштич ва шаҳри Истаравшан аз тариқи пойгоҳҳои обкаши ноҳияи Зафаробод  обёрӣ мешаванд.