Тамғаҳои аксизии худсохти маҳсулоти тамоку ошкор карда шуд

ДУШАНБЕ, 20.04.2017 /АМИТ «Ховар»/. Аз тарафи кормандони Раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди Ҳукумати Ҷумҳурии Тоҷикистон ҳангоми гузаронидани чорабиниҳои фаврӣ — ҷустуҷӯӣ аз дӯконҳои савдои бозори «Фаровон» — и ноҳияи Синои шаҳри Душанбе, ки ба соҳибкорони инфиродӣ А. С., соли таваллудаш 1984, сокини ноҳияи Рӯдакӣ, ҷамоати деҳоти Сарикиштӣ ва Д. А., соли таваллудаш 1986, сокини вилояти Хатлон, ноҳияи Восеъ тааллуқ доранд, ба микдори 22 ҳазор қуттӣ маҳсулоти тамокуи тамғаи «ESSE» ва «PINE» — и истеҳсоли Ҷумҳурии Корея бо аломатҳои тамғагузории аксизии худсохт дарёфт карда шудаанд.
Тавре аз Хадамоти гумрук хабар доданд, мувофиқи хулосаи ташхиси судӣ-техникии ҳуҷҷатҳо, тамғаҳои аксизие, ки дар қуттиҳои тамоку насб карда шудаанд, бо истифодаи техникаи компютерӣ ва нусхабардорӣ тайёр карда шуда, ба тамғаҳои аксизии стандартии аз тарафи Вазорати адлияи Ҷумҳурии Тоҷикистон барои маҳсулоти тамоку пешбинишуда мувофиқат намекунанд.
Нисбат ба шаҳрвандон А. С. ва Д. А. бо моддаи 340 қисми 1 и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, дар тафтишоти Прокуратураи генералии Ҷумҳурии Тоҷикистон қарор дорад.