12 май- Рӯзи байналмилалии ҳамшираҳои шафқат: марҳами беморон маҳз ҳамшираҳои шафқатанд

ДУШАНБЕ, 12.05.2017. /АМИТ «Ховар»/.  Ҳамасола 12 май дар ҷаҳон чун Рӯзи байналмилалии ҳамшираҳои шафқат таҷлил мегардад. Ҳамшираҳои шафқат шахсонеанд, ки маълумоти миёнаи  тиббӣ дошта,  тавсияҳои духтуронро ҳангоми нигоҳубини бемор иҷро мекунанд. Онҳо дар тамоми муддати табобат бо беморон ҳамроҳ буда, ба онҳо хизмат мерасонанд ва марҳами дарди онҳо мегарданд. Дар айни замон дар ҳамаи муассисаҳои тиббӣ бештари кормандонро ҳамшираҳои шафқат ташкил медиҳанд.

Тавре ки аз Маркази саломатии шаҳрӣ  ба хабарнигори АМИТ «Ховар» хабар доданд, дар ин марказ 118 нафар ҳамшираи тиббӣ  фаъолият дошта, 75 %-ашон ҷавононанд. Муовини  директори марказ оид ба  фаьолияти ҳамшираҳо Мавсума Буриева сабаби интихоби ин касбашро дар бемории тӯлонии падару модар медонад.

«Мо дар яке аз деҳаҳои дурдасти Тоҷикистон зиндагӣ мекардем ва Маркази саломатӣ аз деҳаи мо дуртар воқеъ буд. Ҳангоми бемор шудани падар ё модар мо хеле азият мекашидем, зеро шахси  бемор ва солхӯрдаро  то Маркази саломатӣ расонидан хеле душвор буд. Ман  аз ҳамон айём ба худ қавл дода будам, ки ҳангоми хатми мактаб ҳатман корманди соҳаи тиб мешавам. Хушбахтона, ин орзуи ман ҷомаи амал пӯшид ва ман имрӯз ба ҳайси ҳамшираи шафқат кор карда, ба беморон кумак мерасонам»,-гуфт Мавсума Буриева.

Мавсуф аз соли 2000-ум инҷониб дар ин марказ кор карда, малакаашро сайқал медиҳад. Вай мегӯяд, ки  касбашро хеле дӯст медорад. «Ҳангоми ба беморон расонидани ёрии тиббӣ ман хеле хушҳол ва сарбаланд мегардам, зеро касби интихобкардаи ман ба одамон нафъ меоварад. Ҳар гоҳе  ба ягон бемори  солхӯрда кумаки тиббӣ расонам, падару модарам пеши назарам меоянд, зеро аз интихоби ин пешаи ман онҳо хеле розӣ буданд ва дуои неки онҳо ҳамеша бо ман аст»,-илова кард Мавсума.