Ҷаҳон Қурбонов ба нимфинали Чемпионати Осиё роҳ ёфт

ДУШАНБЕ, 04.05.2017 /АМИТ «Ховар»/. Муштзани маъруфи тоҷик Ҷаҳон Қурбонов 3 май дар Чемпионати Осиё оид ба бокс дар пойтахти Ӯзбекистон шаҳри Тошканд дар вазни то 91 кило бар варзишгари покистонӣ Маҳмуд Саноуллоҳ бо ҳисоби 5:0 пирӯз шуд ва ба нимфинал баромад.
Ҷаҳон Қурбонов, ки дар даври аввал озод буд, рақобатро аз даври чорякниҳоӣ шурӯъ кард. Ӯ дар нимфинал 5 май бо Сумит Сангван аз Индонезия, ки дар чорякфинал бар муштзани хитоӣ Фенкал Ю бо ҳисоби 4:1 дастболо шуд, барои ба даври ниҳоӣ роҳ ёфтан талош мекунад. Бояд гуфт, ки новобаста аз натиҷаи ин қувваозмоӣ варзишгари тоҷик Ҷаҳон Қурбонов ҳадди ақал медали биринҷии чемпионати Осиёро соҳиб мешавад.
Намояндаи дигари Тоҷикистон Шаббос Неъматуллоев 3 май дар даври чорякфиналӣ аз муштзани Ӯзбекистон Бектемур Мелиқӯзиев шикаст хӯрд ва аз идомаи мубориза барои медалҳо маҳрум гашт. Ба ин тартиб, дар Чемпионати бокси Осиё аз ҳашт муштзани тоҷик танҳо як нафар- Ҷаҳон Қурбонов муборизаро барои медалҳо идома медиҳад.
Ёдовар мешавем, ки Чемпионати Осиё оид ба бокс дар Тошканд, ки бо ширкати 179 варзишгар аз 28 кишвар ҷараён дорад, 7 май ба поён мерасад. Варзишгарон ба ҷуз медалҳо барои роҳхатҳо ба Чемпионати ҷаҳон оид ба бокс, ки аз 25 август то 4 сентябр дар шаҳри Ҳамбурги Германия баргузор мешавад, мубориза мебаранд.