Амалиёти «Соҳили пок» гарави саломатии инсон ва мавҷудоти зери дарёву баҳрҳо мебошад

ХОРУҒ, 03.05.2017. /АМИТ «Ховар»/. Бештар аз 400 нафар аз сокинони синни гуногун дар амалиёти «Соҳили пок», ки бо иқдоми Раёсати ҳифзи муҳити зисти Вилоти Мухтори Кӯҳистони Бадашон роҳандозӣ шуд, ширкат намуда, соҳили дарёҳои Ғунду Панҷро аз партовҳои истеҳсолию маишӣ тоза намуданд.

Сардори Раёсати мазкур Мулкамон Назаралиев зимни суҳбат бо хабарнигори минтақавии АМИТ  «Ховар» гуфт, ки «дарёи Ғунд шаҳри Хоруғро ба ду қисм ҷудо карда, баъди панҷ километр  ба дарёи Панҷ мерезад. Аз ду тарафи дарё қаҳвахонаву тарабхона, бозору мағозаҳо, муассисаҳои таълимию тандурустӣ ҷойгиранд ва табиист, ки баъди ҳар сари чанд вақт дар назди соҳил ғарами партову ахлотпораҳо пайдо мешаванд.  Боришот ин партовҳоро ба дарё меафканад ва дар поёноб кӯдакону калонсолон ин обро истеъмол мекунанд. Ба ҷуз ин дар қаъри дарё мавҷудоти гуногун ҳастанд, ки аз ин партови кимиёӣ зарар мебинанд. Аз ин рӯ вазифаи сокиноне, ки дар саргаҳи об зиндагӣ мекунанд,  ин аст, ки ҳамеша оби дарёҳоро тозаву пок нигоҳ доранд ва ҳаргиз партовро ба соҳили он напартоянд».

Чунин амалиёт ҳамчунин дар дигар деҳоти  ноҳияҳои вилоят, ки қад -қади дарёи Панҷ ҷойгиранд, баргузор мегардад.