Ҳамоиши донишҷӯёни тоҷик дар Германия бахшида ба Соли ҷавонон

ДУШАНБЕ, 30.05.2017. /АМИТ «Ховар»/. Дар Сафорати Ҷумҳурии Тоҷикистон дар шаҳри Берлин як гурӯҳ ҷавонони донишҷӯи тоҷик, ки дар донишкадаҳои Германия таҳсил менамоянд, бахшида ба Соли ҷавонон ҳамоиш доир намуданд. Дар ин бора аз  Сафорати Ҷумҳурии Тоҷикистон дар Ҷумҳурии Федеративии  Германия ба АМИТ «Ховар» хабар доданд.

Дар ҳамоиш таъкид гардид, ки Давлату Ҳукумати Ҷумҳурии Тоҷикистон, бахусус Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҷавонон ва сиёсати давлатии ҷавонон аз рӯзҳои аввали сарвариашон таваҷҷуҳи хосса зоҳир менамоянд. Дар ҳама давраҳои минбаъдаи раванди давлатсозии миллӣ Пешвои миллат ҳамеша ба насли ҷавони кишвар такя намуда, онҳоро ба иштироки фаъолона дар ҳаёти сиёсӣ, иқтисодӣ ва фарҳангии мамлакат ва саҳм гузоштан дар рушди Тоҷикистони соҳибистиқлол раҳнамун месозанд.

Дар ҳамоиш раиси Ҷамъияти дӯстии Тоҷикистону Германия доктор Александр Хайзер сухан гуфта, ҷавононро ба омӯзиши касбу ҳунар даъват намуд.

Дар ҳамоиш иброз гардид, ки дар пеши ин насли ояндасоз масъулияти бузург — мутахассиси сатҳи баланд шуда, барои давлату миллати худ хизмати фарзандона намудан истодааст.

Иштирокдорон иброз доштанд, ки он ҷавононе, ки дар хориҷи кишвар таҳсил менамоянд, дар баробари дониши хубу аъло доштан, бояд бо рафтору кирдори худ муаррифгари фарҳангу тамаддуни куҳани миллати хеш бошанд.