Ҷавонони ватандӯсту ватанпарвар масъулияти бузургро ба дӯш доранд

ДУШАНБЕ, 11.05.2017 /АМИТ «Ховар»/. Бо иқдоми Кумитаи иҷроияи Ҳизби Халқии Демократии Тоҷикистон (КИ ҲХДТ) дар шаҳри Душанбе дар Литсей-интернати президентӣ барои кӯдакони болаёқати Ҷумҳурии Тоҷикистон  таҳти унвони «Ҷавонони ватандӯсту ватанпарвар масъулияти бузургро ба дӯш доранд» ҳамоиш доир гардид.

Дар ҳамоиш аҳли маориф ва илм, устодон ва хонандагон иштирок карданд.

Ҷамшед Олимов, мудири шуъбаи кор бо ҷавонони КИ ҲХДТ дар шаҳри Душанбе иброз дошт, ки Соли ҷавонон эълон гардидани соли 2017 аз ҷониби Пешвои миллат муҳтарам Эмомалӣ Раҳмон нишонаи боварӣ, таваҷҷуҳ ва ғамхорӣ ба ин қишри ҷомеа аст.

Сиёсати давлатии ҷавонон сиёсатест, ки барои татбиқи он тамоми сохторҳои ҳукумативу ҷамъиятӣ бояд фаъолияти муштарак ба роҳ монанд. Бо истифода аз неруи созандаи наслҳои имрӯзу фардо ба манфиати давлату ҷомеа тарбия кардани онҳо вазифаи аввалиндараҷаи мост, то ки ҷавонону наврасон аз даст задан ба ҳар гуна аъмолу омилҳои зишт, аз қабили пайвастан ба сафи гурӯҳҳои тундраву ифротгаро худдорӣ кунанд.

Дар вохӯрӣ ҳамчунин зикр гардид, ки ҷавонон ҳамчун идомадиҳандаи таъриху фарҳанги қадимаи миллат, сарчашмаи ташаббусҳои бузург,  манбаи ғояҳои нав, парчамбардорони миллат, эҷодкорони тақдири имрӯзу оянда, таҳкимбахшандагони ваҳдати миллӣ, муҳофизони боэътимоди истиқлолияти Ватан, бунёдгузорони давлати мутамаддини дунявӣ ва демократӣ эътироф гардида, дар ободонии Ватан масъулияти калоне бар  дӯш доранд.