Дар ноҳияи Дарвоз Маркази пазироию иттилоотӣ ва хизматрасонии техникӣ барои сайёҳон фаъол гардид

ХОРУҒ, 22.05.2017 /АМИТ «Ховар»/. Бо мақсади ба меъёри байналмилалӣ мутобиқ кардани хизматрасонӣ барои сайёҳони дохилию хориҷӣ дар шаҳраки Қалъаи Хуми ноҳияи Дарвоз Маркази пазироию иттилоотӣ ва терминал расман ба фаъолият оғоз намуд.  Марказ дорои 10 утоқи меҳмондорӣ, майдончаи махсус барои таъмир ва нигаҳдории нақлиёт, ҳаммому дигар намуди хизматрасонии маишӣ мебошад. Менеҷери Барномаи ҷонибдории инкишофи иҷтимоии манотиқи кӯҳистони Бадахшони Бунёди Оғохон  Мадад Назриев гуфт, ки «ноҳияи Дарвоз дарвозаи Бадахшон аст ва ҳар як сайёҳе, ки вориди вилоят мешавад, нахуст дар ин ҷо дам мегирад. Дар Маркази пазироӣ ва иттилоотӣ тамоми маълумот оид ба маконҳои таърихӣ, чашмаҳои шифобахш, иқлим, забон ва урфу одатҳои мардуми кӯҳистон гирдоварӣ шудаанд. Қабл аз сафар ба шаҳри Хоруғ ва дигар ноҳияҳои Вилояти Мухтори Кӯҳистони Бадахшон сайёҳон дар ин марказ маълумоти зарурӣ ба даст меоранд. Меҳмонхона низ дар шакли миллӣ сохта шудааст ва барои дамгирию суҳбат ҷойҳои муносиб дорад. Берун аз меҳмонхона боз чанд суҳбатгоҳҳои тобистона бунёд шудаанд ва меҳмонон имкон доранд аз ин ҷо шаҳрчаи Қалъаи Хумро тамошо кунанд».

Ин дуюмин Маркази пазироӣ ва иттилоотӣ барои сайёҳон дар ВМКБ мебошад. Бори нахуст чунин марказ дар шаҳри Хоруғ соли 2008 бо иқдоми Ассотсиатсияи экологӣ-фарҳангӣ таъсис дода шуд, ки ҳоло дар риштаи сайёҳӣ яке аз муассисаҳои муваффақ ба шумор меравад.