Дар ноҳияи Рашт Рӯзи оила ботантана таҷлил гардид

РАШТ, 13.05.2017. /АМИТ «Ховар»/. Дар Қасри фарҳанги ноҳияи Рашт бо иштироки беш аз 500 нафар сокинони ноҳия ба ифтихори Рӯзи байналмилалии оила, ки 15 май таҷлил мешавад,  ҷамъомад доир гардид. Дар ин бора аз шуъбаи кор бо занон ва оилаи ноҳияи Рашт ба хабарнигори АМИТ «Ховар» иттилоъ доданд.

Дар ҷамъомад тӯйи 14 ҷуфт навхонадорон баргузор гардида, ба се нафар кӯдакони навзод шаҳодатномаи таваллуд дода шуд. Инчунин ба 14 ҷуфт навхонадорон ва 8 оилаи намунавии ноҳия аз тарафи Мақомоти иҷроияи ҳокимияти давлатии ноҳия туҳфаҳои хотиравӣ тақдим шуд.

Зимни ҷамъомад ороиши дастурхони хонавода, анвои гуногуни нон ва таомҳои миллӣ, либосҳои арӯсии қадимӣ ва замонавӣ, ҳунарҳои дастӣ, аз қабили қолинбофию адрасбофӣ ва дигар дастовардҳо ба тамошо гузошта шуданд.