Дар Тоҷикистон пагоҳ Рӯзи Дави миллӣ баргузор мегардад

ДУШАНБЕ, 20.05.2017 /АМИТ «Ховар»/.  Ҳамасола якшанбеи сеюми моҳи май дар Ҷумҳурии Тоҷикистон Рӯзи Дави миллӣ баргузор мегардад. Ин иқдом бо мақсади таҳкими тарзи ҳаёти солим, рушду инкишофи соҳаи варзиш ва оммавияти он байни аҳолӣ, дар асоси Фармони  Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон аз 28 марти соли 2007 «Дар бораи Рўзи Дави миллӣ» ҳамасола якшанбеи сеюми моҳи май дар саросари кишвар доир мегардад.  Имсол  Ҷумҳурии Тоҷикистон  10-солагии Рӯзи  Дави миллиро   сарҷамъона ҷашн мегирад.

21 майи соли равон Дави миллӣ  дар шаҳри Душанбе соати 08:00 оғоз гардида, дар он  намояндагони  тамоми ташкилоту муассисаҳо ва ҷавонону наврасон иштирок  менамоянд.

Тавре аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ба АМИТ «Ховар» хабар доданд, масофаи Дави миллӣ зиёда аз 10 км-ро дарбар гирифта, аз даромадгоҳи маҳаллаи Чорбоғ оғоз мегардад ва иштирокчиён тавассути хиёбони Ҳофизи Шерозӣ то Наврӯзгоҳ миёни ҳам сабқат менамоянд.

Дар интиҳо ғолибон муайян гардида, ба онҳо медалу ифтихорнома ва туҳфаҳои хотиравӣ тақдим карда мешаванд.

Ёдовар мешавем, ки  Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон   бо фарзандони худ 20 майи соли 2006 дар Дави миллӣ   иштирок намуданд ва пас аз он аз соли 2007 Дави миллӣ ҳамасола дар сатҳи ҷумҳуриявӣ  таҷлил карда мешавад.