Фестивал-намоишгоҳи панҷуми «Авто Ретро- Душанбе» оғоз гардид

ДУШАНБЕ, 06.05.2017. /АМИТ «Ховар»/. Имрӯз дар шаҳри Душанбе бо мақсади дастгирии ташаббуси ҷомеаи шаҳрвандӣ бахшида ба 72-юмин солгарди Рӯзи Ғалаба дар Ҷанги Бузурги Ватании солҳои 1941-1945 Фестивал-намоишгоҳи панҷуми «Авто Ретро- Душанбе» ҷараён дорад.
Тавре мухбири АМИТ «Ховар» иттилоъ медиҳад, намоишгоҳи мазкур аз ҷониби Мақомоти иҷроияи ҳокимияти давлатии шаҳри Душанбе ва Иттиҳодияи ҷамъиятии «Клуби дӯстдорони мошинҳои нодиру эксклюзивӣ ва мототсиклҳо» дар ҳамкорӣ бо вазорату идораҳои дахлдор баргузор гардида истодааст, ки то соати 18:00 дар ҳудуди меҳмонхонаи «Ҳаятт Реҷенси»-и Душанбе ва ҶДДМ «Кохи Наврӯз»-и шаҳри Душанбе идома хоҳад ёфт.
Дар фестивал-намоишгоҳ мошинҳои қадимии истеҳсоли Иттиҳоди Шӯравӣ, Аврупо ва Амрико ба тамошо гузошта шудаанд
Дар Ғарб чунин намоишгоҳҳо-фестивалҳоро «олдтаймер-галлерея» меноманд. «Олдтаймер» калимаи англисӣ буда, «қадима, мошини нодир» тарҷума мешавад ва одатан мошинҳоеро, ки беш аз 30 сол пеш истеҳсол шудаанд, ифода мекунад. Бинобар ин, меҳмонони Фестивал-намоишгоҳи панҷуми «Авто-ретро Душанбе» метавонанд аз тамошои ретро-мошинҳои нодир ва тамошобоби тамғаҳои «Победа», «Москвич», «Волга», «Запарожец», «Лада», «Volkswagen», «Ford», «Chevrolet» «Pontiac» ва албатта, «Mercedes-Benz», ки дар Ғарб рамзи асосии ҳаракати дӯстдорони олдтаймерҳо маҳсуб мешавад, ҳаловат баранд.
Ёдовар мешавем, ки нахустин ретро-намоишгоҳи мошинҳо дар Душанбе моҳи апрели соли 2013 баргузор шуда буд.