Гусели сарбозон ба хонаи волидайн муташаккилона сурат мегирад

ДУШАНБЕ, 09.05.2017. /АМИТ «Ховар» /. Дар отрядҳои сарҳадӣ ва ҷузъу томҳои Қӯшунҳои сарҳадӣ маъракаи гусели сарбозоне, ки хизмати ҳатмии ҳарбиро ба анҷом расонданд, бо маром идома дорад, — иттилоъ дод ба АМИТ «Ховар» сардори хадамоти матбуоти Қӯшунҳои сарҳадии мамлакат Муҳаммад Улуғхоҷаев.
Тавре ки М.Улуғхоҷаев зикр кард, дар доираи иҷрои Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллудашон 1990-1999-и Ҷумҳурии Тоҷикистон» дирӯз дар отряди сарҳадии Мурғоб маросими гусели сарбозоне, ки хизмати ҳарбиро адо карданд, сурат гирифт.
«Ин сарбозони далеру шуҷоъ хизматро дар дурдасттарин минтақаи кишвар — ноҳияи Мурғоби Вилояти Мухтори Кӯҳистони Бадахшон адо намуда, бо сари баланду табъи болида ба назди волидайни худ бармегарданд. Хизмат дар ин минтақа махсусиятҳои худро дошта, аз марзбонон далериву ҷасурӣ, иродаи қавӣ ва пуртоқатиро талаб менамояд», — таъкид кард М.Улуғхоҷаев.
Роҳбарияти қисмҳои ҳарбӣ ба сарбозон барои хизматҳои шоён миннатдорӣ ва арзи сипос намуда, умед карданд, ки дар оянда низ ин родмардон барои ободиву осоиштагии меҳан саҳми шоистаи худро мегузоранд.
Иттилоъ дода шуд, ки ин ҳомиёни марзу буми аҷдодӣ тавассути тайёраҳо аз болои қуллаҳои барфпӯши Боми ҷаҳон гузашта, ба шаҳрҳои Душанбеву Хуҷанд фиристонида шуданд.
Ҳамин гуна маросимҳои гусели сарбозон дар тамоми ҷузъу томҳои Қӯшунҳои сарҳадии КДАМ ҶТ ба таври тантанавӣ идома дошта, масъулин баҳри дар сатҳи баланд гузаронидани гусели сарбозон тадбирҳои заруриро амалӣ мекунанд.
Сарбозоне, ки дар минтақаҳои наздик зиндагӣ мекунанд дар давраи навбатӣ ба эҳтиёт рухсат шуда, бо роҳкиро таъмин карда мешаванд.
Дар хадамоти матбуоти Қушунҳои сарҳадӣ иттилоъ доданд, ки чунин маросими гусели сарбозон дар маркази таълимии «Пойтахт» бо иштироки Фармондеҳи Қӯшунҳои сарҳадии КДАМ ҶТ генерал-лейтенант Раҷабалӣ Раҳмоналӣ баргузор карда шуд.