«Корвони саломатӣ»-и Вазорати тандурустӣ ба сокинони шаҳри Кӯлоб хизмати ройгони тиббӣ мерасонад

ДУШАНБЕ, 13.05.2017 /АМИТ «Ховар»/.  Имрӯз  «Корвони саломатӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар шаҳри Кӯлоб ба мардуми маҳаллӣ ва ноҳияҳои атрофии он хизмати ройгони тиббӣ мерасонад. Дар ин бора аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.

Бино ба иттилои манбаъ,  дар доираи сафари «Корвони саломатӣ» беш аз 65 нафар мутахассисони баландпояи  соҳаи тиб, устодони Донишгоҳи давлатии тиббии Тоҷикистон ба номи Абӯалӣ ибни Сино, сармутахассисони соҳа, устодони Донишгоҳи баъдидипломии кормандони тибби Тоҷикистон, директорону мутахассисони муассисаҳои ҷумҳуриявӣ  ба мардуми маҳаллӣ хизмат мерасонанд.

Инчунин дар баробари маслиҳату машварат  аҳолӣ аз ташхиси ройгони тиббӣ гузаронида мешавад. Бо ин мақсад  мошинҳои  сайёри флюорографӣ, ташхиси ҷузъҳои хун, ташхиси ВНМО, ташхиси бемориҳои сироятӣ сафарбар карда шудаанд.

Ҳамчунин мутахассисони  муассисаҳои марказӣ дастгоҳҳои ташхиси ултрасадо, сабти барқии кори дил, ташхиси гастроскопӣ, офталмологӣ,  гӯшу гулӯ ва бинӣ ва дигар асбобҳои заруриро бо худ доранд.

Бояд зикр намуд, ки табобат асосан дар Беморхонаи клиникии вилоятии ба номи Ҳақназаров ва Маркази саломатии рақами 2 шаҳри Кӯлоб сурат мегирад.