Ғолиби даври ниҳоии озмуни вилоятии «Беҳтарин роҳбари созмони хонандагон» ба озмуни ҷумҳуриявӣ роҳхат гирифт

ХОРУҒ, 02.05.2017. /АМИТ «Ховар»/. Дар Маркази эҷодии кӯдакону наврасони шаҳри Хоруғ бо ширкати 8 нафар аз намояндагони марказҳои эҷодии кӯдакону наврасони шаҳру ноҳияҳои Вилояти Мухтори Кӯҳистони Бадахшон  даври ниҳоии озмуни «Беҳтарин роҳбари созмони хонандагон» баргузор шуд. Ин озмун ҳамасола бо ибтикори Вазорати маориф ва илми ҷумҳурӣ доир мегардад ва  омӯзгорон аз 7 намуди шарт байни худ рақобат мекунанд. Мушовири созмони хонандагони вилоят Ҳусния  Элназарова гуфт, ки «ҳадафи асосии озмун баланд бардоштани сатҳи дониш, малакаву маҳорати эҷодкории роҳбарони маҳфилҳо мебошад. Омӯзгороне, ки  ҷараёни дарсро бо усули кӯҳна ва танҳо аз рӯи китобҳои дарсӣ доир намуда, аз истифодаи асбобу анҷом ва адабиёти иловагӣ истифода намебаранд, ҳеҷ гоҳ дар касби худ муваффақ намешаванд. Баръакс, ба ташаккули тафаккури хонандагон монеа эҷод мекунанд. Мақсади озмун пайдо кардани омӯзгорони ташаббускор, навовар, забондон ва огоҳ аз таърихи кишвару арзишҳои миллии он мебошад. Ва яке аз дигар мақсадҳои муҳим- ин ташвиқу паҳн кардани таҷрибаи ғолибони озмун аст».

Дар озмуни имсолаи «Беҳтарин роҳбари созмони хонандагон» корманди Маркази эҷодии кӯдакону наврасони шаҳри Хоруғ Фотима Бахтиёрова пирӯзӣ ба даст оварда, ба озмуни ҷумҳуриявӣ, ки дар пойтахти кишвар- шаҳри Душанбе баргузор мешавад, роҳхат гирифт.