Озмуни ҷумҳуриявии «Нозирони навраси ҳаракат дар роҳ» ҷамъбаст гардид

ДУШАНБЕ, 30.05.2017. /АМИТ«Ховар»/. Ҳафтаи сипаригардида дар Маҷмааи сайёҳии «Варзоб» озмуни ҳафтуми ҷумҳуриявии «Нозирони навраси ҳаракат дар роҳ», ки тайи панҷ рӯз бо шукӯҳи хоса ҷараён гирифт, ҷамъбаст шуд. Дар ин бора аз Вазорати корҳои дохилии Ҷумҳурии Тоҷикистон хабар доданд.
Дар озмун 10 даста дар ҳайати 100 нафар нозирони навраси ҳаракат дар роҳ аз шаҳри Душанбе, литсейи № 2, Мактаби таҳсилоти миёнаи умумии № 42, шаҳри Конибодом ва ноҳияи Бобоҷон Ғафурови вилояти Суғд, ноҳияҳои Мӯъминобод, Балхии вилояти Хатлон, литсеи Оғохони шаҳри Хоруғи Вилояти мухтори кӯҳистони Бадахшон, минтақаи Рашт, шаҳрҳои Ваҳдат ва Турсунзода ширкат варзиданд.
Дар натиҷа зимни ҷамъбасти озмун дастаи «Нозирони навраси ҳаракат дар роҳ»-и шаҳри Турсунзода сазовори ҷойи аввал, дастаҳои «Нозирони навраси ҳаракат»-и мактаби №42-и шаҳри Душанбе ва ноҳияи Бобоҷон Ғафурови вилояти Суғд сазовори ҷойи дуюм ва дастаҳои «Нозирони навраси ҳаракат дар роҳ»-и ноҳияи Ҷалолиддини Балхии вилояти Хатлон ва дастаи литсейи №2-и шаҳри Душанбе сазовори ҷойи сеюм гардиданд.
Мақсади асосии озмун аз инкишоф додани корҳои ташвиқотиву тарғиботӣ, гирифтани пеши роҳи фалокатҳои роҳу нақлиётӣ, фаҳмонидани оқибати онҳо ба кӯдакону наврасон ва ҷалби диққати ташкилоту идораҳои марбута дар ин самт иборат буд.