Рӯзи Ғалаба рамзи ватандӯстиву иттиҳод ва рӯҳи шикастнопазир аст

ДУШАНБЕ, 02.05.2017. /АМИТ «Ховар»/. Дар Раёсати Вазорати корҳои дохилӣ дар вилояти Хатлон вохӯрии кормандон бо иштирокдорони Ҷанги дуюми ҷаҳонӣ ва собиқадорони мақомоти корҳои дохилии вилоят баргузор гардид.
Тавре аз Вазорати корҳои дохилии Ҷумҳурии Тоҷикистон хабар доданд, дар ҷамъомад муовини сардори РВКД дар вилояти Хатлон Исмат Мируллоев иштирокдоронро ба муносибати 72-солагии иди Ғалаба самимона табрик намуда, афзуд, ки Рӯзи Ғалабаи бузург рамзи ватандӯстиву иттиҳод ва рӯҳи шикастнопазир буда, эҳсоси ватандӯстиро дар дили пиру ҷавон бедор месозад.
Раиси Шӯрои собиқадорони ҷанг ва меҳнати вилояти Хатлон Абдулвоҳид Шодиев изҳор дошт, ки маҳз якдиливу самимият ва дастгириҳои ҷумҳуриҳои бародар, сарсупурдагиву ҷоннисориҳои ватанхоҳон буд, ки ин ғалаба таъмин гардид.
Иштирокдорон аз рӯзҳои мудҳиши ҷанг ёдовар шуда, зикр карданд, ки ҷанг ҳама вақт оқибатҳои нохуш дошта, харобӣ ва қашшоқӣ меорад. Инчунин зикр карда шуд, ки поси хотири ҳалокшудагон, қадрдонии родмардони набардҳои шадид ва заҳмати бепоёни онҳо анъанаи нек ва сабақи пандомез барои наслҳои имрӯзу фардои миллат аст.