Санаи бозии дастаҳои «Истиқлол» ва «Олтин Асир»-и Туркманистон маълум шуд

ДУШАНБЕ, 30.05.2017 /АМИТ«Ховар»/. Шоми 31 май бозии даври финалии марҳилаи гурӯҳии Ҷоми Конфедератсияи футболи Осиё-2017 байни дастаҳои «Истиқлол», қаҳрамони панҷкаратаи Тоҷикистон, бо дастаи «Олтин Асир», қаҳрамони секаратаи Туркманистон дар Варзишгоҳи марказии шаҳри Душанбе баргузор мегардад. Дар ин бора хабарнигори АМИТ «Ховар» иттилоъ медиҳад.
Бояд тазаккур дод, ки бар асоси дастури мусобиқа танҳо ғолиби гурӯҳ ба даври баъдии Ҷоми AFC роҳ меёбад. Барои роҳхати ягона дастаҳои «Истиқлол» ва «Олтин Асир» талош доранд. Тақдири роҳхат дар даври охирин дар бозӣ миёни ин ду даста ҳал хоҳад шуд.
Дар бозии дигари даври ниҳоӣ дар гурӯҳи «D» 31 май ду дастаи
Қирғизистон — «Олой»-и Ӯш ва «Дордой»-и Бишкек бо ҳам рақобат мекунанд.
Ёдовар мешавем, ки дастаи «Истиқлол» бозии даври дуюми марҳилаи гурӯҳии Ҷоми Конфедератсияи футболи Осиё-2017-ро дар гурӯҳи «D» бо дастаи «Олтин Асир» бо ҳисоби 1:1 анҷом дода буд. Ин бозӣ чоруми апрел дар варзишгоҳи «Спорт топлуми»-и шаҳри Балканободи Туркманистон баргузор шуда буд.
Ҷаҳонгир Алиев, бозингари «Истиқлол», дар дақиқаи 31-ум ҳисобро боз кард. Голи ҷавобиро бозингари мизбонон Олтинмурод Аннадурдиев дар нимаи дуюми дидор, дар дақиқаи 49-ум, ба ҳадаф расонд.
Хотиррасон менамоем, ки баъд аз натиҷагирии панҷ даври мусобиқа дар ҷадвали гурӯҳи «D» дастаи «Истиқлол» бо сенздаҳ имтиёз мақоми аввалро касб намудааст.
Дастаи «Олтин Асир» низ сенздаҳ имтиёз ба даст овардааст, вале бо назардошти таносуби тӯбҳо дар мақоми дуюм қарор дорад.
Дастаи «Дордой» бо се имтиёз дар мақоми сеюм аст. Дастаи «Олой» бидуни имтиёз дар зинаи охирин- чаҳорум ҷойгир шудааст.