Сармуҳосиб барои заминфурӯшӣ аз ҳуқуқи ишғоли мансабҳои давлатӣ ва роҳбарикунанда маҳрум гардид

ДУШАНБЕ, 10.05.2017 /АМИТ «Ховар»/. Бо ҳукми суди ноҳияи Рӯдакӣ А. Алихонов барои қаллобӣ ва ғайриқонунӣ додани замин (моддаҳои 247 қ. 4 банди «б» ва 338, эзоҳи 1, қ. 2 банди «в» КҶ Ҷумҳурии Тоҷикистон)  гунаҳгор дониста шуда, ба ӯ ҷазо дар намуди ҷарима ба андозаи 2000  нишондиҳанда барои ҳисобҳо, баробар ба 80 ҳазор сомонӣ бо маҳрум кардан аз ҳуқуқи ишғоли мансабҳои давлатӣ ва роҳбарикунанда ба муҳлати 4 сол таъйин карда шуд.

Тавре ба АМИТ «Ховар» аз Прокуратураи генералии Ҷумҳурии Тоҷикистон хабар доданд, номбурда барои он айбдор дониста шудааст, ки ӯ дар асоси фармони сардори кооперативи истеҳсолии «Сайёд-2006» аз 13 ноябри соли 2013 ба вазифаи  сармуҳосиби кооперативи номбурда таъйин гардида, бо истифода аз мақоми хизматӣ- бо роҳи фиреб ва суиистифода аз боварӣ аз шаҳрванд Н. Қосимов 6000 доллари ИМА гирифтааст. Ӯ дидаю дониста, ки ҳуқуқи ҷудо карда додани заминро надорад, аз заминҳои корами обии кооперативи истеҳсолии «Сайёд-2006», воқеъ дар Ҷамоати деҳоти Сарикиштии ноҳияи Рӯдакӣ ба Н. Қосимов барои сохтмони хонаи истиқоматӣ 0,03 га қитъаи замини наздиҳавлигӣ ҷудо карда додааст.