Соҳили дарёи маркази ноҳияи Ванҷро то мавсими обхезӣ мустаҳкам мекунанд

ХОРУҒ, 26.05.2017 /АМИТ «Ховар»/. Дарозии дарёи маркази ноҳияи Ванҷ каме бештар аз як километр буда, дар ду соҳили он хонаҳои истиқоматӣ, боғу киштзорон, шабакаи обтаъминкунӣ ҷойгиранд. Сардори бахши ситоди ҳолатҳои фавқулодаи  ин ноҳия Аслон Худоиев гуфт, ки «соли гузашта бар асари обхезӣ оби дарё саддро рахна карда, боғу киштзорон ва замини наздиҳавлигии сокинонро хароб кард. Наздик ба 150 метр қубурҳои обгузарро зер кард ва чанд муддат сокинони маркази ноҳияро аз оби тоза маҳрум намуд».

Дар фасли зимистони имсола низ барфи зиёд борид ва эҳтимоли боз баланд шудани оби дарё вуҷуд дорад. Аз ин рӯ мақомоти маҳаллии ҳокимияти давлатии ноҳия бо ирсоли  як нома аз ҳукумати ҷумҳурӣ хоҳиш намуданд, ки дар таҳкими соҳили дарё кумак расонанд.

Ба гуфтаи сардори хоҷагии оби ноҳия Неъмат Холиқов, «мо ба наздикӣ  маводи сӯзишворию сохтмонӣ  гирифтем ва ба таҳкими соҳил оғоз кардем. Сокинони маҳалаҳои ҷамоати деҳот  бунёду кашидани симтӯрро бар дӯши худ гирифтанд ва ҳамарӯза  мутобиқи навбат  ба ҳашар мебароянд».

Ҳаво торафт гармтар мешавад ва ин бошандагони маркази ноҳияро  водор мекунад, ки ҳарчӣ зудтар соҳили дарёро  маҳкам карда, аз хисороти офати табиӣ ҷилавгирӣ намоянд.