Таваҷҷуҳ ба ҷавонон воситаи муҳими дурнамои рушди устувори ҷомеаву давлат хоҳад буд

ДУШАНБЕ, 05.05.2017. /АМИТ «Ховар»/. 3 май дар остонаи Рӯзи ҷавонони Тоҷикистон вохӯрии намояндагони як зумра муассисаҳои давлатӣ ва сохторҳои қудратии кишвар бо донишҷӯёни Донишкадаи молия ва иқтисоди Тоҷикистон  баргузор шуд.

Тавре аз донишкадаи мазкур хабар доданд, дар вохӯрӣ масъалаҳои самаранокии сиёсати давлатии ҷавонон ва самтҳои афзалиятноки он, баланд бардоштани маърифати зеҳнии ҷавонон, ташаккули тарзи ҳаёти солим, пешгирии ҷомеа, бахусус ҷавонон аз зуҳуроти номатлубу хатарафзо мавриди баррасӣ қарор гирифт.

Дилошуб Розиқов, намояндаи Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бобати масъалаҳои самаранокии сиёсати давлатии ҷавонон ва самтҳои афзалиятноки он сухан ронда, гуфт, ки «дар шароити имрӯзаи ҷаҳонӣ ҷавонон захираи тиллоии миллату кишварҳо маҳсуб ёфта, таваҷҷуҳ ба онҳо воситаи муҳими дурнамои рушди устувори ҷомеаву давлат хоҳад буд. Аммо аз сӯи дигар ҷавононро мебояд истифодабарии самараноки имкониятҳои мавҷудаи ҷомеаро дарк намуда, ҷиҳати худташаккулдиҳӣ кӯшиш ба харҷ диҳанд».

Акмал Олимшоев, ҳуқуқшиноси Кумитаи кор бо занон ва оилаи назди Ҳукумати Ҷумҳурии Тоҷикистон доир ба дастгириҳои давлатии занону бонувон андешаронӣ карда, афзуд, ки солҳои охир занону духтарон ба як неруи фаъолу пешбарандаи кишвар мубаддал гашта, нақши онҳо дар идораи сохторҳои пешбарандаи ҷомеа беш аз пеш назаррас мегардад.