Ваҳдати миллӣ–ғояи миллӣ

ДУШАНБЕ, 21.05.2017. /АМИТ «Ховар»/. Ба истиқболи ҷашни 20 — солагии Ваҳдати миллӣ, дар Академияи Вазорати корҳои дохилӣ мизи мудаввар дар мавзӯи «Ваҳдати миллӣ — ғояи миллӣ» бо иштироки шоирон, намояндагони Ҳамоҳангсозии ҳаракати Ваҳдати миллӣ ва эҳёи Тоҷикистон, ҳайати профессорону омӯзгорон, курсантон ва ҷамъияти илмии курсантон «Ҳомии тартибот» — и кафедраи ҳуқуқи маъмурӣ ва фаъолияти маъмурии Академияи мазкур, баргузор гардид. Дар ин бора аз Академияи Вазорати корҳои дохилӣ хабар доданд.
Ба иттилои манбаъ дар чорабинӣ Гулназар Келдӣ – шоири халқии Тоҷикистон дар мавзӯи «Таҷассуми ваҳдати миллӣ дар шеъри муосир», Мирзошоҳрух Асрорӣ — мушовири калони ҳамоҳангсозии ҳаракати Ваҳдати миллӣ ва эҳёи Тоҷикистон дар мавзӯи «Омилҳои таҳкими Ваҳдати миллӣ дар замони муосир», Рамазон Давлатов — раиси кумитаи иҷроияи ҳаракати Ваҳдати миллӣ ва эҳёи Тоҷикистон, дар мавзӯи «Нақши Ваҳдати миллӣ дар таҳкими худшиносии миллӣ» баромад карда, андешаҳои хешро баён намуданд.
Зикр гардид, ки ба шарофати ба имзо расидани созишномаи тақдирсоз, яъне созишномаи Ваҳдати миллӣ мо тавонистем, ки ба муноқишаҳои дохилӣ ва муқовиматҳои мусаллаҳона хотима бахшида, ба марҳалаи навини Тоҷикистон – гузоштани пойдевори сулҳ, таъмини Ваҳдати миллӣ ва дар ин асос ба эътидол овардани фаъолияти соҳаҳои хоҷагии халқи Тоҷикистон ва рушди онҳо оғоз намоем.