Ваколати вакили Маҷлиси намояндагон пеш аз муҳлат қатъ гардид

ДУШАНБЕ,11.05.2017/АМИТ «Ховар»/. Ваколати вакили Маҷлиси намояндагон Дилшод Исматуллозода бо қарори Маҷлиси намояндагон 11 май пеш аз муҳлат қатъ гардида, инчунин аз  ҳайати Кумитаи Маҷлиси намояндагон оид ба  энергетика,  саноат, сохтмон ва коммуникатсия бароварда шуд. Бояд тазаккур дод, ки Дилшод Исматуллозода 8 май дар асоси Амри Президенти Ҷумҳурии Тоҷикистон муовини роҳбари Дастгоҳи иҷроияи Президенти Ҷумҳурии Тоҷикистон  таъйин  гардид.

Шукурҷон Зуҳуров, Раиси Маҷлиси намояндагон дар ҷаласаи навбатии иҷлосияи сеюми палатаи поёнии Парлумони мамлакат гуфт, ки  Дилшод Исматуллозода зимни фаъолияти 2,5- солааш дар Парлумони касбии мамлакат яке аз вакилони фаъол, масъулиятшинос ва дорои  хислатҳои хуби инсонӣ ба шумор рафта, дар рушди парламентаризми кишвар саҳми муносиб гузоштааст.

Ҳамзамон  барои  фаъолияти  пурсамар дар рушди  қонунгузорӣ, намояндагӣ ва робитаҳои байнипарлумонӣ  Шукурҷон Зуҳуров, Раиси палатаи поёнии Парлумони мамлакат  Дилшод Исматуллозодаро бо Ифтихорномаи Маҷлиси намояндагони  Маҷлиси  Олии Ҷумҳурии Тоҷикистон сарфароз  гардонид.