Вазъи баъзе корхонаҳои шаҳру навоҳии минтақаи Кӯлоб нигаронкунанда аст

ДУШАНБЕ, 03.05.2017 /АМИТ «Ховар»/. Қурбон Ҳакимзода, муовини аввали раиси вилояти Хатлон дар ҷараёни ҷаласаи назоратии роҳбарони ташкилоту муассисаҳои минтақавӣ ҷиҳати дар соли равон фаъолият накардани баъзе корхонаҳои шаҳру навоҳии минтақаи Кӯлоб изҳори нигаронӣ кард. Дар ин бора аз Мақомоти иҷроияи ҳокимияти давлатии вилояти Хатлон хабар доданд.
Тавре ки манбаъ иттилоъ дод, Қ.Ҳакимзода зикр намуд, ки тӯли 4 моҳ бо сабабҳои номаълум дар шаҳри Кӯлоб 25 корхона, дар ноҳияи Восеъ 17 корхона ва ноҳияи Мир Сайид Алии Ҳамадонӣ 34 корхона фаъолияти истеҳсолӣ накарданд. Ҳамчунин ба масъулин дастур дода шуд, ки омилҳои фаъолият накардани онҳоро санҷида, барои фаъол сохтани онҳо тадбирҳо андешанд.
Муовини аввали раиси вилоят дар баробари ин масъалаи нигаронкунанда, инчунин дар хусуси фаъолияти муассисаҳои тандурустии навоҳии минтақа изҳори андеша карда, масъулини соҳаро хушдор доданд, ки дар ҳифзи саломатии модарону кӯдакон бештар саҳм гиранд.