Вазири варзиши Ҷумҳурии Доғистон: «Ман бо таъриху фарҳанги тоҷикон шиносам ва ба он арҷ мегузорам»
![](https://khovar.tj/wp-content/uploads/2017/05/Vaziri-varzishi-um-urii-Do-istoni-FR-Man-bo-tarihu-far-angi-to-ikon-oshno-doram-va-ba-on-ar-meguzoram-.jpg)
ДУШАНБЕ, 16.05.2017 /АМИТ «Ховар»/. Вазири варзиши Ҷумҳурии Доғистони Федератсияи Россия Муҳаммад Муҳаммадов, ки бо сафари корӣ дар ҳайати намояндагон бо Роҳбари Ҷумҳурии Доғистони Федератсияи Россия Рамазон Абдулатипов ба вилояти Суғд рафта буданд, аз Донишгоҳи давлатии Хуҷанд ба номи академик Бобоҷон Ғафуров боздид ба амал овард.
Тавре аз Маркази иттилоот ва таҳлили раёсати Донишгоҳи давлатии Хаҷанд хабар доданд, зимни мулоқот ректори донишгоҳ профессор Ҷамшед Ҷўразода ба Муҳаммад Муҳаммадов роҷеъ ба фаъолияти илмию таълимӣ ва тарбиявии донишгоҳ маълумоти мухтасар дод.
Муҳаммад Муҳаммадов аз намоиши китоб ва маҳсули эҷоду ҳунари устодону донишҷўёни донишгоҳ боздид карда, аз ҷумла гуфт: «Тоҷикон яке аз халқҳои қадимии минтақаи Осиёи Марказӣ буда, хушбахтона, урфу одат ва анъанаҳои аҷдодони онҳо то имрўз пойдор аст. Ман бо таъриху фарҳанги тоҷикон шиносам ва ба он арҷ мегузорам».
Ҷамшед Ҷўразода чун рамзи эҳтиром китобҳои устодон ва дигар туҳфаҳои хотиравиро ба Муҳаммад Муҳаммадов тақдим намуд.