Ба роҳ мондани ҳамкорӣ миёни Донишгоҳи Лейден ва ниҳодҳои таълимии Тоҷикистон муҳокима гардид

ДУШАНБЕ, 10.06.2017. /АМИТ «Ховар»/. 8 июни соли 2017 Сафири Фавқулода ва Мухтори  Ҷумҳурии Тоҷикистон дар кишварҳои Бенилюкс /Белгия, Нидерланд, Люксембург/  Эркинхон Раҳматуллозода бо Ректор – Президенти Донишгоҳи Лейдени Шоҳигарии Нидерланд, профессор Карел Столкер вохӯрӣ намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, зимни мулоқот ҷонибҳо масъалаҳои ба роҳ мондани ҳамкорӣ миёни Донишгоҳи Лейден ва ниҳодҳои пажӯҳишию таълимии Ҷумҳурии Тоҷикистонро муҳокима намуданд.

Ҳамчунин имконияти ҳамкорӣ бобати мубодилаи донишҷӯёну устодон ва дастрасӣ ба бурсияҳо барои таҳсил дар Донишгоҳи Лейден баррасӣ гардиданд.

Худи ҳамон рӯз вохӯрии Сафир бо Директори иҷроияи Пажӯҳишгоҳи Донишгоҳи Лейден оид ба тадқиқоти минтақавӣ (The Leiden University Institute for Area Studies), профессор Франк Пайк баргузор гардид.

Бояд зикр кард, ки ин Пажӯҳишгоҳ таърих, дин, фарҳанг, забон ва вазъи минтақавии Осиёро меомӯзад.