Дар Душанбе бо мақсади дастгирии табақаҳои ниёзманди ҷомеа ҳамоиш доир гардид

ДУШАНБЕ, 07.06.2017 /АМИТ«Ховар»/. Бо ташаббуси мақомоти иҷроияи  ҳокимияти давлатии шаҳри Душанбе, Академияи Вазорати корҳои дохилӣ, муассисаҳои таҳсилоти миёнаи умумии рақамҳои 7 ва 10-и ноҳияи Исмоили Сомонӣ, донишҷӯёни Донишгоҳи миллии Тоҷикистон дар саҳни бинои Маркази минтақавии хизмати иҷтимоӣ бо иштироки нафақахӯрон ва маъюбони шаҳри Душанбе бахшида ба Соли ҷавонон, 20-солагии Рӯзи Ваҳдати миллӣ ва 25-солагии таъсиси ин марказ ҷамъомади бошукӯҳ баргузор гардид.

Тавре аз Вазорати корҳои дохилии Ҷумҳурии Тоҷикистон хабар доданд, ба ин хотир саҳни марказ идона оро дода шуда, нафақахӯрон бо табъи болида дар он ҳузур доштанд.

Дар ҷамъомад ҷавонон дар васфи Модар-Ватан, Ваҳдати миллӣ, Истиқлолияти давлатӣ шеърҳо қироат намуданд. Сипас, дастаи ҳаваскорони Академияи ВКД барои бошандагони марказ консерти идона намоиш доданд.