Дар Ярмаркаи «Суғд–2017» беш аз 100 шартнома ба имзо расонида шуд

ХУҶАНД, 22.06.2017  /АМИТ «Ховар»/. Дар Ярмаркаи байналмилалии тиҷорат «Суғд-2017», ки 16 – 17 июни соли равон дар шаҳри Хуҷанд баргузор гардид, беш аз 100 шартномаи ҳамкорӣ бобати пешниҳоди маҳсулот ва густариши ҳамкорӣ байни иштирокдорон ба имзо расонида шуд.

Тавре ба мухбири  АМИТ «Ховар» муовини Раиси вилояти Суғд Анвар Яъқубӣ иброз дошт: «Дар мулоқоту гуфтушунидҳо ва Форуми тиҷоратию сармоягзорӣ дар мавзӯи «Неруи содиротӣ ва рушди савдои байналмилалӣ», ки дар доираи Ярмарка баргузор гардиданд, бо ба имзорасии шартномаҳои ҳамкории тарафайн натиҷаҳои дилхоҳ ба даст омаданд.

Аз ҷумла соли равон бори аввал ҳайати бонуфуз аз Ҷумҳурии Ӯзбекистон бо намояндагии 30 ширкат аз доираи соҳибкорони истеҳсолӣ таҳти сарварии роҳбари Палатаи савдо ва саноати шаҳри Тошканд Файзулло Маманов дар ярмарка иштирок намуда, байни намояндагии доираи соҳибкорӣ ва Палатаи савдо ва саноати Ҷумҳурии Ӯзбекистон ва доираи соҳибкорони Суғд  беш аз 70 шартнома ба маблағи беш аз 2,5 миллион сомонӣ ба имзо расиданд».

Бояд зикр кард, ки Ярмарка дар сатҳи баланди омодагиву ташкилӣ ба роҳ монда шуда, дар кори он дар радифи иштироки беш аз 150 ширкату хоҷагиҳои манотиқи гуногуни Тоҷикистон, инчунин зиёда аз 200 нафар намояндагони доираҳои соҳибкории Россия, Беларус, Ӯзбекистон, Қирғизистон, Қазоқистон, Лаҳистон, Хитой ва Латвия ширкат намуданд.

Дар доираи Ярмарка озмуни вилоятии «Маҳсулоти беҳтарин» ва Фестивали гулҳо низ баргузор шуд, ки ин муаррифгари на танҳо молу маҳсулот соҳибкорони маҳаллӣ, балки бардошт аз урфу анъана, зебоипарастӣ ва обокории сокинони ин минтақа гувоҳӣ медод.