Дилшод Назаров дар мусобиқаи ҷаҳонии гурзандозӣ дар Германия соҳиби медали нуқра гардид

ДУШАНБЕ, 02.06.2017 /АМИТ «Ховар»/.  Варзишгари маъруфи тоҷик, дорандаи медали тиллои олимпӣ Дилшод Назаров дар мусобиқаи ҷаҳонии гурзандозӣ дар шаҳри Ҳаллеи Ҷумҳурии Федеративии Германия гурзро ба  масофаи 77 метру 11 сантиметр ҳаво дода, соҳиби мақоми дуюм ва медали нуқра гардид. Ин аввалин мусобиқаест, ки ӯ пас аз пирӯзӣ дар Олимпиадаи Рио-2016 иштирок кардааст. Дар ин бора хабарнигори АМИТ «Ховар» иттилоъ медиҳад.

Бояд зикр кард, ки   дар мусобиқаи ҷаҳонии гурзандозӣ дар шаҳри  Ҳаллеи Германия  варзишгари  Полша  Павел Фаҷдек  бо натиҷаи 82 метру 31 сантиметр сазовори ҷои аввал ва медали тилло шуд. Ник Миллер аз Британия бо натиҷаи 76 метру 81 сантиметр ҷойи сеюмро гирифт.

Ёдовар мешавем, ки  Дилшод Назаров соли гузашта дар панҷ даври мусобиқоти ҷаҳонӣ ширкат карда, бо 236.37 имтиёз дар феҳристи зӯртарин гурзандозҳои ҷаҳон мақоми дуюмро соҳиб гардид. Соли гузашта ӯ дар Бозиҳои XXXI тобистонаи олимпӣ дар шаҳри Рио-де-Жанейрои Бразилия гурзро ба масофаи 78 метру 68 сантиметр ҳаво дода, бо медали тилло сарфароз гашт. Вай барандаи медали нуқраи мусобиқаи Чемпионати ҷаҳон дар соли 2015 дар шаҳри Пекини Чин мебошад.

«Мусобиқаи асосии имсола Чемпионати ҷаҳон аст, ки аз 4 то 13 август дар Лондон баргузор мешавад. Ман Тоҷикистонро намояндагӣ мекунам. Кӯшиш менамоям, ки медал ба даст биёрам. Дар варзиш пешгӯӣ кардан мушкил аст, аммо умедворам, ки муваффақ мешавам», — гуфт Дилшод Назаров.

Аз рӯи натиҷаҳои мусобиқоти имсола ҳоло Дилшод Назаров бо 77,11 метр дар даҳгонаи беҳтарин дар ҷойи нуҳум қарор дорад.

Ба рӯйхати се ҷойи аввал Павел Фаҷдек (Полша, 82,31 м), Войтсех Новитски (Полша, 78,54 м) ва Павел Барейша (Булғористон, 78,04 м) дохиланд.