Экологҳои тоҷик аз Ашқобод баргаштанд

ДУШАНБЕ, 12.06.2017/АМИТ «Ховар»/.Ҳайати Ҷумҳурии Тоҷикистон  иборат аз мутахассисону намояндагони вазорату идораҳои кишвар аз пойтахти Туркманистон шаҳри  Ашқобод баргаштанд. Онҳо дар Форуми байналмилалии  экологии  Осиёи Марказӣ, ки бо ибтикори Кумитаи давлатӣ оид ба ҳифзи муҳити зисти Туркманистон ва Маркази экологии минтақавии Осиёи Марказӣ рӯзҳои 5-7 июн  баргузор гардид, иштирок намуданд.

Аз Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар» иттилоъ доданд, ки дар Форум беш аз 200 нафар намояндагони созмону идораҳои давлатӣ, илмӣ ва ҷамъиятии панҷ кишвари минтақа, инчунин коршиносони созмонҳои байналмилалӣ аз  Шататҳои Муттаҳидаи Америка, Чехия, Швейтсария, Япония, Германия, Франсия, Италия бо мақсади равона кардани кӯшишҳои  муштарак ва ташаккули назари ягона барои расидан ба рушди устувор ва таҳкими ҳамкории минтақавӣ дар масъалаҳои ҳифзи муҳити зист иштирок намуданд.

Дар Форум ҳайати Тоҷикистон фаъолона ширкат кард.  Муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон Саидумрон Абдураҳмонзода зимни  суханронияш аз таваҷҷуҳи доимии Ҳукумати Ҷумҳурии Тоҷикистон, бахусус  мамлакат муҳтарам Эмомалӣ Раҳмон  ҷиҳати ба роҳ мондани ҳамкории минтақавӣ дар масъалаҳои ҳифзи муҳити зист ёдовар шуд. Мавсуф иброз дошт, ки муносибати шариконаи Тоҷикистон бо кишварҳои Осиёи Марказӣ ва  созмонҳои байналмилалӣ, бахусус бо институтҳо ва сохторҳои Созмони Милали Муттаҳид /СММ/, назири Комиссияи аврупоии иқтисодии СММ, ЮНЕП, СПЕКА, ЭСКАТО на танҳо таҳкимёбии ҳамкориро таъмин мекунад, балки барои рушди сифатан нав заминаи мусоид фароҳам меорад.

Дар бахши «Ҳамкорӣ оид ба масъалаҳои об дар Осиёи Марказӣ» сардори департаменти сиёсати вобаста ба масъалаҳои оби Вазорати энергетика ва захираҳои оби Ҷумҳурии Тоҷикистон  Гул Шарипов  дар мавзӯи «Даҳсолаи байналмилалии амал «Об барои рушди устувор, барои солҳои 2018-2028» ва ташаббусҳои Ҷумҳурии Тоҷикистон оид ба масъалаҳои об, дар бахши «Тағйирёбии иқлим дар Осиёи Марказӣ» сардори Маркази обуҳавосанҷии Агентии обуҳавошиносии кишвар Ҷамила Байдуллоева дар мавзӯи Сиёсати миллии Ҷумҳурии Тоҷикистон дар самти тағйирёбии иқлим» маърӯза намуданд. Ҳамчунин сармуҳаррири нашрияи «Инсон ва табиат» Ҷамолиддин Яқубов  ва сардори Маркази ахбори экологии Кумитаи ҳифзи муҳити зисти  назди  Ҳукумати   Ҷумҳурии Тоҷикистон Гулрухсор Тиллоева  дар мавзӯи «Нақши ВАО дар раванди ҳамгироӣ оид ба ҳалли  масъалаҳои ҳифзи муҳити зист» сухан карданд.

Дар маросими пӯшидашавии Форум муовини раиси палатаи қонунбарори Маҷлиси Олии Ҷумҳурии Ӯзбекистон Борий Алихонов  иброз дошт, ки Тошканд ҷиҳати баргузории Форуми навбатии байналмилалии Осиёи Марказӣ дар  соли 2018  омодагӣ хоҳад  гирифт.