Корманди БДА ҶТ «Амонатбонк» барои тартиб додани расидҳои қалбакӣ дастгир гардид

ДУШАНБЕ, 06.0.2017 /АМИТ «Ховар»/. Маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти нозир-хазинадор оид ба мубодилаи асъори филиали №75 БДА ҶТ «Амонатбонк» дар ноҳияи Балҷувон Хосият Муродалиева хабар додааст.
Тавре дар сомонаи Агентӣ омадааст, номбурда дар давраи фаъолияти кориаш ба номи нафақахӯрон дар ҳудуди ноҳияи Балҷувон дар якчанд ҳолат расидҳои қалбакӣ тайёр намуда, дар маҷмӯъ 71862,15 сомониро аз филиали бонк тасарруф карда, ба манфиати шахсиаш сарф намудааст.
Манбаъ ҳамчунин иттилоъ додааст, ки нисбат ба Хосият Муродалиева парвандаи ҷиноятӣ оғоз шуда, тафтишоти пешакӣ идома дорад.