Намоиши аксҳо дар бораи дастовардҳои Ваҳдати миллии Тоҷикистон дар Малайзия

ДУШАНБЕ, 16.06.2017 /АМИТ «Ховар»/. Бахшида  ба 20-солагии Ваҳдатӣ миллӣ дар  Малайзия бо иштироки ҳамватанони бурунмарзӣ ва донишҷӯёни муқими  он оид ба  ҳадафи тарғиби ғояҳои сулҳпарваронаи Пешвои миллат намоиши аксҳо дар бораи  дастовардҳои Ваҳдати миллӣ ва дарси садоқат ва ватандӯстӣ доир гардид.

Дар ин бора ба мухбири АМИТ «Ховар» аз Сафорати  Ҷумҳурии Тоҷикистон дар Малайзия   хабар доданд.

Тавре ки   манбаъ иттилоъ дод,  Сафири Фавқулода ва Мухтори Ҷумҳурии Тоҷикистон дар Малайзия Музаффар Муҳаммадӣ ҳозиринро ба муносибати 20-солагии Ваҳдати миллӣ табрик гуфта, онҳоро ба таҳкими дӯстӣ, поксозии қалбҳо ва ваҳдату ягонагӣ даъват намуд.

Номбурда зимни суханронӣ аз таърих ва дастовардҳои раванди Ваҳдати миллӣ ёдовар шуда, таъкид намуд:  «Маҳз бо талошу ҷонбозиҳои Пешвои миллат муҳтарам Эмомалӣ Раҳмон миллати тоҷик бо хиради азалии худ тавонист ба ваҳдат ва ягонагӣ бирасад».  Музаффар Муҳаммадӣ  дар идома аз донишҷӯён даъват намуд, ки ҳадафҳои созандаи роҳбарияти олии кишварро ҷонибдорӣ ва дастурамали ҳамешагии худ қарор диҳанд, инчунин аз шомилшавӣ ба ҳизбу ҳаракатҳои террористиву экстремистӣ дурӣ ҷӯянд.