С. Аслов ва Я. Гуедар рушди муносибатҳои дуҷониба ва бисёрҷонибаи Тоҷикистону Франсияро муҳокима намуданд

ДУШАНБЕ, 07.06.2017 /АМИТ «Ховар»/.  7 июни соли 2017 Вазири корҳои хориҷии Ҷумҳурии Тоҷикистон Сироҷидин Аслов Сафири Фавқулода ва Мухтори Ҷумҳурии Франсия дар Ҷумҳурии Тоҷикистон хонум Ясмин Гуедарро ба ҳузур пазируфт.

«Зимни мулоқот ҷонибҳо вазъи кунунӣ ва дурнамои рушди муносибатҳои дуҷониба ва бисёрҷонибаи Тоҷикистону Франсияро муҳокима намуданд»,- хабар доданд аз Вазорати корҳои хориҷии Ҷумҳурии Тоҷикистон.

Зимни суҳбат аз сатҳу мӯҳтавои ҳамкории мутақобилан судманди ду кишвар дар соҳаҳои сиёсӣ, иқтисодӣ ва фарҳангӣ дар 25 соли муносибатҳои дипломатӣ изҳори қаноатмандӣ карда шуд. Мусоҳибон ҷиҳати таҳкими минбаъдаи муколамаи сиёсӣ ва дарёфти роҳу воситаҳои нави тавсеаи робитаҳо дар самтҳои мавриди эҳтимоми муштарак ибрози омодагӣ намуданд.

Ҳамчунин доир ба мавзӯъҳои мубрами рӯзномаи минтақавӣ ва байналмилалӣ мубодилаи афкори созанда сурат гирифт.