Санҷиши низоми таҳсили хонандагон камбудиҳоро ошкор кард

ДУШАНБЕ, 08.06.2017 /АМИТ «Ховар»/. Бо мақсади пешгирии ҳуқуқвайронкунӣ ва дигар амалу кирдорҳои номатлуб дар байни наврасону ҷавонон, кормандони Хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилии Ҷумҳурии Тоҷикистон пайваста дар муассисаҳои таълимӣ вохӯриҳои пешгирикунанда ва санҷишҳои муштарак мегузаронанд.

Тавре аз Вазорати корҳои дохилии Ҷумҳурии Тоҷикистон хабар доданд, ҳангоми гузаронидани санҷиши навбатие, ки дар муассисаҳои таҳсилоти миёнаи умумии рақамҳои 11, 37, 50 ва 56-и пойтахт доир карда шуд, муайян гардид, ки дар соатҳои дарсӣ бархе хонандагон дар машғулиятҳо иштирок накарда, ба корҳои беҳуда машғул мешаванд. Либосҳои мактабӣ ва намуди зоҳирии ин хонандагон низ ба талабот ҷавобгӯ нест.

Ба зикри манбаъ, санҷиши гузаронидашуда нишон дод, ки иштироки хонандагон дар дарсҳо фаъол набуда, ҳангоми мушоҳидаи рақами тартибии журнали синфӣ маълум гардид, ки дар ҳар синфхона 7-8-нафарӣ дар дарс иштирок надошта, дар баъзе синфхонаҳо бо вуҷуди оғоз шудани соати дарсӣ аз омӯзгорон дарак набуд.

«Масъулини соҳаи маориф, аз ҷумла маъмурияти муассисаҳои таҳсилоти миёнаи умумиеро, ки ҳангоми санҷишҳои кормандони милитсия камбудиҳояшон ошкор шуданд, зарур аст бо андешидани тадбирҳои зарурӣ ҳарчи зудтар камбудиҳоро бартараф намуда, низоми муназзами таҳсили хонандагонро таъмин намоянд»,-иттилоъ дода шуд аз Вазорат.