Таъмини аҳолии ноҳияҳои дурдаст бо дастгоҳи нави тиббии ИЭГ
![](https://khovar.tj/wp-content/uploads/2017/06/dastgohi-navi-tibbi-baroi-nohiyaho.jpg)
ДУШАНБЕ, 06.06.2017 /АМИТ «Ховар»/. Дар бахши кумаки аввалияи тиббию санитарии ноҳияи Қубодиён бо дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон барои ташхиси бемории асаб- эпилепсия дастгоҳи нави ИЭГ ворид карда шуд, ки сокинони ноҳияҳои Шаҳритус, Қубодиён ва Н. Хусрав метавонанд аз он истифода намоянд. Дар ин бора аз Мақомоти иҷроияи ҳокимияти давлатии вилояти Хатлон хабар доданд.
Тавре ки манбаъ иттилоъ дод, дар ноҳияи Қубодиён инчунин шуъбаи бемориҳои дили беморхонаи марказии ноҳия таъмир гардид, ки барои бистарикунонии беморони дилу фишорбаландӣ ва хизматрасони тиббии босифат ба шаҳрвандони ноҳия шароити мусоид фароҳам овард.
Ҳамчунин зикр гардид, ки айни ҳол бо дастгирии молиявии Бонки ҷаҳонӣ дар деҳаҳои К.Маркс ва Андрееви ноҳияи Ҷ.Балхӣ, дар деҳаҳои «Дӯстӣ» ва «Қулобод»-и ноҳияи Ёвон сохтмони марказҳои саломатии деҳот бо маблағи 2 миллиону 400 сомонӣ барои ҳар кадом ноҳия идома дорад.