Аминзода ба гумрукчиён роҳу усулҳои мубориза бо коррупсияро тавзеҳ дод

      ДУШАНБЕ, 14.07.2017/АМИТ «Ховар»/. Татбиқи «Стратегияи муқовимат ба коррупсия дар Ҷумҳурии Тоҷикистон барои солҳои 2013 — 2020» зимни ҷамъомаде, ки  дар Хадамоти гумруки назди Ҳукумати Ҷумҳурии Тоҷикистон бо иштироки ҳайати шахсии мақомоти мазкур бо кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон доир гардид, баррасӣ шуд.

Сардори Раёсати ташкилию бозрасии Хадамоти гумруки назди Ҳукумати Ҷумҳурии Тоҷикистон Хуршед Бобоев оид ба бартараф намудани камбудиҳои ошкоргардида вобаста ба  татбиқи «Стратегияи муқовимат ба коррупсия дар Ҷумҳурии Тоҷикистон барои солҳои 2013 — 2020» сухан кард. Инчунин доир ба бартараф намудани сабаб ва шароити ба ҷиноятҳои коррупсионӣ мусоидаткунанда ва таъмини иҷрои фармони Президенти Ҷумҳурии  Тоҷикистон,  моҳият ва ҳадафи Стратегияи мазкур Нигора Аминзода,  сардори Раёсати 2 — юми Сарраёсати пешгирии коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон маърӯза намуд.

Аз Хадамоти гумрук ба АМИТ «Ховар» иттилоъ доданд, ки дар ҷамъомад хавфҳо, роҳу усулҳои пешгирии омилҳои коррупсионӣ, дарки амиқи зарару оқибатҳои ногувори он, иҷрои талаботи қонунгузории зиддикоррупсионӣ ва  татбиқи он тавзеҳ дода шуд. Таъкид гардид, ки баргузории чунин ҷамъомаду вохӯриҳо ҷиҳати таҳкими ҳамкории муштараки мақомоти зиддикоррупсионӣ ва гумрук дар самти ҷилавгирӣ ва муборизаи беамон бо ин зуҳуроти  номатлуб- коррупсия  заминаи мусоид фароҳам меорад.