Аз бағоҷи як мусофир як адад тангаи давраи подшоҳӣ ва 29 адад тангаи муосири Россия дарёфт ва мусодира гардид

ДУШАНБЕ, 20.07.2017 /АМИТ «Ховар»/. 30 адад тангаҳои гардишашон мутаалиқ ба Россия ва замонҳои гуногун   аз  бағоҷи дастии шаҳрванди 26- солаи Ҷумҳурии Тоҷикистон  Ҳ.С., ки ба   хатсайри Душанбе – Екатеринбург нияти парвоз дошт, зимни муоинаи гумрукӣ аз ҷониби гумрукчиён  дар Фурудгоҳи байналмилалии  Душанбе дарёфт  ва мусодира гардид.

Аз Хадамоти гумруки назди Ҳукумати Ҷумҳурии Тоҷикистон ба АМИТ «Ховар» иттилоъ доданд, ки  аз 30 адад тангаҳои мусодирагардида  29 адад номинали сиккаҳои (1, 2, 5, 10 рубл ва 10, 50 копек) муосири Федератсияи Россия  ва 1 ададаш сиккаи фулузии соли бароришаш 1821-ро ташкил медиҳад, ки дар маркази намои он бо ҳуруфи русии қадим -кирилӣ «2 копейки /Е.М» бо барги дарахти нахл дар ҳошия ва дар қисми болои марказӣ тоҷ ҳаккокӣ гардидааст.  Дар самти муқобили ин сикка тасвири салтанати Россияи  подшоҳӣ ва дар маркази он рамзи яке аз князгариҳои Россияи подшоҳӣ  ҳаккокӣ шудааст. Гуфта мешавад, ки дар асоси хулосаи мутахассисони Вазорати фарҳанги Ҷумҳурии Тоҷикистон сиккаи мазкур дорои қимати таърихию фарҳангӣ, нумизматикӣ ва осорхонавӣ буда, тибқи қонунгузории Ҷумҳурии Тоҷикистон интиқоли ғайрирасмии он аз ҳудуди Ҷумҳурии Тоҷикистон манъ аст.

Бино ба иттилои  манбаъ, нисбат ба шаҳрванд Ҳ.С. парвандаи ҷиноятӣ бо моддаҳои 32 қисми 3 ва 289 қисми 3 – и Кодекси ҷиноятии Ҷумҳурии Тоҷикистон оғоз гардида, ба Прокуратураи нақлиёти Ҷумҳурии Тоҷикистон фиристонида шудааст.