Либоси сиёҳ, бахусус сатру ҳиҷоб хоси фарҳанги миллиямон нест ва мо занон онро ҳеҷ гоҳ қабул надорем

ФАЙЗОБОД, 21.07.2017 /АМИТ «Ховар»/. Барои аз байн бурдани тақлидкорию бегонапарастӣ  ва пешгирии вуруди фарҳанги бегона  дар пӯшидани либос бахши  кор бо занон ва оилаи назди Мақомоти иҷроияи ҳокимияти давлатии ноҳияи Файзобод дар асоси нақшаю чорабиниҳо дар якҷоягии гурӯҳҳои корӣ  дар бозорҳои ноҳия  ва ҷамоатҳои шаҳраку деҳот  миёни фурӯшандаю харидорон ва ҷавондухтарони тақлидкор вохӯрию суҳбатҳои инфиродӣ доир менамоянд.

Мудири бахши кор бо занон ва оилаи ноҳия Гул  Халифаева иброз намуд, ки  мақсад аз баргузор намудани  ин суҳбатҳо рӯ  наовардани занону бонувон ба фарҳанги бегона, махсусан  фарҳанги пӯшидани либос ва аз банди худнамоию таассуб,  тақлидкориву ҷиҳозпарастӣ раҳо гардидани онҳо мебошад. Хушбахтона, он бонувону ҷавондухтарони ноҳия, ки   либосҳои сиёҳу  дарози ба фарҳанги мо хос набударо ба бар кардаанд, дар натиҷаи корҳои фаҳмондадиҳӣ ва муомилаю муносибати хуби  гурӯҳҳои корӣ, ҳақиқатро дарк карда, аз тақлидкорӣ даст кашиданд.

Яке аз занҳои собиқадори ноҳия Алқос Мавлонова гуфт:  «Муддатҳост  мо, занони  собиқадору фаъол миёни занону бонувони ноҳия дар тӯю маъракаҳо  корҳои фаҳмондадиҳиро ба роҳ монда, занону духтаронро баҳри ҳифзи арзишҳои миллӣ, ҳунаромӯзӣ, касбомӯзӣ, пӯшидани либосҳои миллӣ  ва хотима бахшидан ба зуҳуроти нангини бегонапарастӣ, тақлиду таассуб ва зоҳирпарастӣ даъват менамоем. Мо, бонувони тоҷик бояд бо либоси милии хеш  фахр намуда, ҳамеша аз фарҳанги тоҷикии хеш пайравӣ намоем. Либоси сиёҳ, бахусус сатру ҳиҷоб хоси фарҳангии миллиямон нест ва мо занон онро ҳеҷ гоҳ қабул надорем. Гузаштагони мо мегуфтанд, ки либосҳои сиёҳ қалбҳои бонувонро сиёҳ мегардонад ва сабаби ба бемориҳои рӯҳию ҷисмӣ гирифтор шудани онҳо мешавад».