М. Худоёров барои ғояҳои «Давлати исломӣ»-ро қабул ва ҷонибдорӣ кардан 12 солу 6 моҳ аз озодӣ маҳрум гардид

ДУШАНБЕ, 17.07.2017 /АМИТ «Ховар»/. Бо ҳукми Суди ноҳияи  И. Сомонии  шаҳри  Душанбе  М. Худоёров бо моддаи 32  қисми 3-401¹ КҶ Ҷумҳурии Тоҷикистон гунаҳгор  дониста  шуда, ба  муҳлати 12 солу 6 моҳ  аз озодӣ маҳрум гардид.

М. Худоёров аввалҳои соли 2015 ҳангоми дар шаҳри Климовский Федератсияи Россия ба ҳайси муҳоҷири меҳнатӣ қарор доштан тавассути шабакаҳои иҷтимоии «Телеграмм», «Вотсап» ва «В контакте» бо узви ташкилоти террористии «Давлати Исломӣ» Абу-Салоҳ Ахмедов ном ӯзбекзабони шахсияташ ба тафтишот номаълум шинос шуда, ғояҳои ин гурӯҳро қабул ва ҷонибдорӣ кардааст. Номбурда дидаю дониста, ки иштироки шаҳрвандони Ҷумҳурии Тоҷикистон дар воҳиди мусаллаҳ, задухӯрди мусаллаҳона ё амалиёти ҷангӣ дар ҳудуди дигар давлатҳо хилофи қонун буда, ҷиноят эътироф шудааст, мақсади ба давлати Сурия рафтан ва дар амалиётҳои ҷангӣ иштирок намуданро кардааст.

Тавре ба АМИТ «Ховар» аз Маркази матбуоти Прокуратураи генералӣ хабар доданд, М. Худоёров дар вақти сафар тариқи хатсайри «Москва-Истанбул» дар Фурудгоҳи байналмилалии Домодедово ҳангоми бақайдгирии чипта аз ҷониби кормандони ҳифзи ҳуқуқ дастгир карда шуда, ба Ҷумҳурии Тоҷикистон интиқол гардид.