Мутахассисони «Тоҷикстандарт» дар ним сол 1010 тонна маҳсулоти ғайристандартиро ошкор намуданд

ДУШАНБЕ, 14.07.2017/АМИТ «Ховар»/. Мутахассисони Агентии «Тоҷикстандарт» дар натиҷаи гузаронидани назорати давлатӣ ва корҳои сертификатсионӣ дар шаш моҳи соли ҷорӣ 1010 тонна маҳсулоти гуногуни  хӯроквории ғайристандартиро ошкор намудаанд.

Ибодулло Қурбониён, директори  Агентии стандартизатсия, метрология, сертификатсия ва нозироти савдои назди Ҳукумати  Ҷумҳурии Тоҷикистон (Тоҷикстандарт) 14 июл дар Душанбе зимни нишасти матбуотӣ ба хабарнигорон гуфт, ки аксар маҳсулоти ғайристандартие, ки аз ҷониби мутахассисони Агентии «Тоҷикистандарт» зимни гузаронидани назорати давлатӣ ба қайд гирифта шудаанд,  бо роҳи қочоқ ворид гардидаанд. Роҳбари мақомоти «Тоҷикстандарт» зикр  намуд, ки як қисми ин  маҳсулотҳо  аз ҷиҳати нишондоди сифат ва бехатарӣ ва қисми дигараш аз рӯи тамғагузорӣ ба талабот ҷавобгӯ набуданд.

Таъкид шуд, ки дар ин давра дар озмоишгоҳҳои ташхисии маҳсулоти ғизоии Агентии  «Тоҷикстандарт» аз рӯи сифату бехатарӣ ва тамғагузорӣ  71 тонна маҳсулоти гӯштӣ, 339 тонна равғани растанӣ,  беш аз 15 тонна  маҳсулоти макаронӣ, зиёда аз 6,9 дал нушокиҳои спиртӣ (1 дал баробар  ба 10 литр), беш аз 4,4  дал нӯшокиҳои ғайриспиртӣ, 93 тонна маҳсулоти қаннодӣ, 69 тонна маҳсулоти ширӣ,  66 тонна консерваҳо, 37,5 тонна чой, какао, қаҳва, 111 тонна иловагиҳои ғизоӣ, 10 тонна меваю сабзавот ва дигар маҳсулот аз ташхис гузаронида шуданд, ки қисми зиёдашон маҳсулоти воридотианд. Зикр шуд, ки дар иртибот ба ин масъала  нисбати  соҳибкорони воридкунандаи ин маҳсулотҳои ғайристандартӣ чораҳои маъмурӣ андешида шуданд.