Бунёди терминали боркашонӣ дар Фурудгоҳи байналмилалии Душанбе ба афзоиши ҳаҷми боркашонӣ мусоидат менамояд

ДУШАНБЕ, 02.08.2017 /АМИТ «Ховар»/. Вазорати нақлиёти Ҷумҳурии Тоҷикистон аз афзоиши ҳаҷми боркашонӣ тавассути ширкатҳои ватанию хориҷии ҳавонавардӣ дар фурудгоҳҳои байналмилалии  Тоҷикистон  иттилоъ медиҳад. Зикр гардид, ки дар нимсолаи аввали соли  равон  ҳаҷми боркашонӣ тариқи фурудгоҳҳои байналмилалии Душанбе, Хуҷанд, Кӯлоб ва Қӯрғонтеппа  1767,5 тоннаро ташкил дод, ки ин нишондод дар қиёс ба ҳамин давраи соли гузашта  9 фоиз зиёд аст.
Аз ҳаҷми умумии молу маҳсулоте, ки тавассути фурудгоҳҳои байналмилалии Тоҷикистон  кашонида шудаанд,   986,2 тонна ба ширкатҳои ҳавонавардии Тоҷикистон «Сомон Эйр», «Тоҷик Эйр»  ва боқимонда  ба ширкатҳои ҳавопаймоии хориҷӣ   рост  меояд.
Афзоиши ҳаҷми боркашонӣ дар фурудгоҳҳои байналмилалии кишварамон дар ҳолест, ки соли равон  татбиқи лоиҳаи «Беҳтар намудани инфрасохтори  Фурудгоҳи байналмилалии Душанбе» барои сохтмони терминали боркашонӣ  дар Фурудгоҳи байналмилалии Душанбе  ба маблағи 17,5 миллион доллар расман оғоз гардид. Интизор меравад, ки бо бунёди ин иншооти барои иқтисодиёти кишварамон муҳим ҳаҷми боркашонии фурудгоҳӣ беш аз пеш афзоиш  меёбад.